ئەردۆغان و شەرع لەبارەی دۆخی ئێستای سووریا پەیوەندییەکی تەلەفۆنی ئەنجام دەدەن

ئاڤا نیوز

لەچوارچێوەی پەیوەندییەکی تەلەفۆنیدا ڕەجەب تەیب ئەردۆغان، پشتیوانی خۆی بۆ ئەحمەد شەرع و گەلی سووریا دووپات کردەوە. 

وێنە گەورەکە: ڕۆژی چوارشەممە، 16-7-2025، ئیسرائیل هێرشێکی بەرفراوانی ئاسمانی بۆ سەر سووریا دەستپێکرد، هێرشەکان کۆشکی سەرۆکایەتی و وەزارەتی بەرگرییان لە دیمەشق کردە ئامانج و کارداناوەی بەدوای خۆیدا هێنا.

ڕاگەیێنراوی فەرمی: سەرۆکایەتیی کۆماری تورکیا بڵاویکردەوە، ڕەجەب تەیب ئەردۆغان، سەرۆککۆماری تورکیا پەیوەندییەکی تەلەفۆنی بە هاوتا سوورییەکی ئەحمەد شەرع کردووە و تاوتوێ دوایین پێشهات و ئەو گۆڕانکارییانەیان کردووە کە ئێستا لە سووریا ڕوودەدەن. 

سەرۆککۆماری تورکیا لە پەیوەندییەکەدا ڕایگەیاندووە کە هێرشەکانی ئیسرائیل بۆ سەر سووریا قبووڵکراو نین و هەڕەشەن بۆ سەر تەواوی ناوچەکە.

ئەو دوپاتی کردەوە کە تورکیا بەردەوام دەبێت لە پشتیوانیکردنی گەلی سووریا، وەک ئەوەی کە تا ئێستا کردوویەتی.

هەروەها پێشوازی لە ئاگربەستەکە کرد کە لەگەڵ کۆمەڵی درووز لە سووریا بەدەست هاتووە.

لەلایەکی دیکەوە: ئەحمەد شەرع، سەرۆککۆماری سووریا، سوپاسی سەرۆک ئەردۆغانی کرد بۆ پشتیوانیی تورکیا لە پاراستنی یەکگرتوویی سیاسیی سووریا، یەکپارچەیی خاکەکەی و سەروەرییەکەی.