ئەردۆغان: کوردانی سووریا برای ئێمەن و ڕێگە نادەین ئیسرائیل بەکاریان بهێنێت

ئاڤا نیوز

ڕەجەب تەیب ئەردۆغان، سەرۆککۆماری تورکیا، جەخت لەوە دەکاتەوە کە کوردانی سووریا برای ئەوانن و  ڕێگە نادەن ئیسرائیل بەکاریان بهێنێت.


وێنە گەورەکە: ڕۆژی چوارشەممە، 16-7-2025، لە دژی هێرشکردنە سەر پێکهاتەی درووز لە شاری سوەیدا، ئیسرائیل هێرشێکی بەرفراوانی ئاسمانی بۆ سەر سووریا دەستپێکرد، هێرشەکان کۆشکی سەرۆکایەتی و وەزارەتی بەرگرییان لە دیمەشق کردە ئامانج و کارداناوەی بەدوای خۆیدا هێنا.

چیرۆکی سەرەکی: ئەردۆغان لەدوای تەواوبوونی کۆبوونەوەی کابینەی سەرۆکایەتی کۆماری تورکیا  قسەی لەسەر دۆخی ئێستای سووریا کرد و گوتی: ئیسرائیل دەوڵەتێکی تیرۆریستە کە ماف و حەق ناناسێت، هەوڵدەدات ناوچەکە بەرەو شەڕ پەلکێش بکات، کوردانی سووریا خوشک و برای ئێمەن و ڕێگە نادەین لەلایەن ئیسرائیلەوە بەکاربهێنرێن".

لێدوانی فەرمی: ئەردۆغان هۆکاری شەڕ و ئاڵۆزییەکانی سووریا بۆ ئیسرائیل دەگەڕێنێتەوە و دەڵێت: ئیسرائیل نە لە سووریا و نە لە غەززە ئاشتەوایی ناوێت، ئێمە وەک تورکیا بەردەوام دەبین لە پشتیوانیکردنی سووریا، ئەرکی دراوسێیەتی خۆمان بەرامبەر بە سووریا بەجێ دەگەیێنین. 

لە بەشێکی دیکەی قسەکانیدا ئەردۆغان گوتیشی: "پێشووتر ڕێگەمان نەداوە سەقامگیری سووریا تێکبدات و هیچ کاتێکیش ڕێگە نادەین، ڕێوشوێنی پێویستمان بۆ هەموو جۆرە سیناریۆیەک  گرتووەتە بەر. ئێمە وەک دوژمن لە کەس نزیک نابینەوە، ئێمە تەنیا ئاشتەوایی و سەقامگیریمان بۆ ناوچەکە دەوێت".