لە شوێنی مانەوەی هاندەرانی زاخۆ لە بەغدا ئاگر كەوتەوە

ئاڤا نیوز


لە شاری بەغدا، لەو هۆتێلەی كە شوێنی مانەوەی دەیان هاندەری یانەی زاخۆ و ژمارەیەك ڕۆژنامەنووسی وەرزشی بوو ئاگر كەوتەوە.

وێنە گەورەكە: كاتژمێر (8:00)ی ئەمشەو لە یاریگەی شەعب لە شاری بەغدا، یاریی كۆتایی جامی عێراق بۆ تۆپی پێ لەنێوان هەردوو یانەی دهۆك و زاخۆ بەڕێوەدەچێت.

زانیاریی بەدەستهاتوو: بەرەبەیانی ئەمڕۆ هەینی 18-7-2025، لە هۆتێل كۆشكی غەدیر لە شاری بەغدا ئاگر كەوتەوە، كە شوێنی مانەوەی هاندەرانی یانەی زاخۆ و ڕۆژنامەنووسانی وەرزشیی زاخۆیە كە بۆ ڕووماڵكردنی یاریی نێوان دهۆك و زاخۆ ئێستا لە شارەكەن.

 

زانیاریی زیاتر: هۆتێلەكە زیاتر لە 100 كەسی تێدا بووە و نزیكەی 50 كەسیان هاندەری یانەی زاخۆ و ڕۆژنامەنووس بوونە، ئاگرەكە لە نهۆمی چوارەم كەوتووەتەوە و بەو هۆیەوە چەند كەسێك تووشی هەناسەتەنگی بوونە و چارەسەری پێویستیان بۆ كراوە.

 

ئەمەش بزانە: هۆتێلێكی دیكە بۆ ئەو 50 كەسە لە هاندەرانی یانەی زاخۆ و ڕۆژنامەنووسەكان دابین كراوە و بۆ ئەوێ دەگواسترێنەوە.