ترەمپ یاسای دراوە دیجیتاڵییەکان واژۆ دەکات

ئاڤا نیوز

دوای واژۆکردنی یاسای دراوە دیجیتاڵییەکان ئەمریکا بە فەرمی بووە خاوەنی ڕێسایەکی تایبەت بە ڕێکخستنەوەی دراوە دیجیتاڵییەکان.

چیرۆکی سەرەکی: سەرۆکی ئەمریکا یاسای جینیسی واژۆکرد کە چوارچێوەیەکی یاسایی بۆ بەکارهێنانی دراوی دیجیتاڵی ستەیبڵکۆین (stablecoins) لە ئەمریکا دیاریکرد.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، بەڵێنمدا ئازادی و سەرکردایەتی بۆ ئەمریکا بگەڕێنینەوە و ئەمریکا بکەینە پایتەختی دراوی دیجیتاڵی جیهان و بەڵێنەکەشم جێبەجێکرد.

هەنگاوێکی گەورە دەنێین بە چەسپاندنی باڵادەستی ئەمریکا لە بواری دارایی جیهانی و تەکنەلۆژیای دراوە دیجیتاڵییەکان.

ئەوەی پێویستە بیزانیت: ستەیبڵکۆین جۆرێکە لە دراوی دیجیتاڵی کە بەهاکەی بەستراوەتەوە بە سەروەت و سامانێکی جێگیرەوە، وەک دۆلاری ئەمریکی، بەمەبەستی کەمکردنەوەی بەرزبوونەوە و دابەزینی نرخەکەی. ئەم یاسایە لە هەردوو ئەنجومەنی نوێنەران و پیرانی ئەمریکا بە پشتیوانییەکی بەرفراوانی هەردوو پارتی کۆماری و دیموکرات پەسەند کراوە.

ئەوەی لە بارەیەوە دەگوترێت: بەپێی پێشبینییەکانی وەزارەتی گەنجینەی ئەمریکا تا ساڵی 2030 بەهای بازاڕی ستەیبڵکۆین لە ئەمریکا دەگاتە 3.7 تریلیۆن دۆلار.