ڕێککەوتنێکی حەوت خاڵی بۆ کۆتاییهێنان بە گرژییەکانی سوەیدا ڕاگەیێنرا

ئاڤا نیوز

میدیاکانی سووریا وردەکاریی ڕێککەوتنێکی ئاگربەستیان لە پارێزگای سوەیدا ئاشکرا کرد، کە بە نێوەندگیریی ئەمریکا و پشتیوانیی تورکیا و ئوردن لە نێوان حکومەتی سووریا و ئیسرائیلدا ئەنجام دراوە. ڕێککەوتنەکە ئامانجی کۆتاییهێنانە بەو گرژییانەی کە لە چەند ڕۆژی ڕابردوودا ناوچەکەی گرتبووەوە و بووە هۆی ئاوارەبوونی دەیان هەزار کەس.

 

وێنە گەورەکە: دوای نزیکەی هەفتەیەک لە شەڕ و پێکدادانی نێوان خێڵە بەدەوییەکان و چەکدارانی دروز لە سوەیدای سووریا، دواجار، نێردەی ئەمریکا بۆ سووریا، ڕایگەیاند، بنیامین نەتانیاهۆ، سەرۆکوەزیرانی ئیسرائیل و ئەحمەد شەرع، سەرۆککۆماری سووریا  بۆ قۆناغی ڕاگوزەر، بە پشتیوانی ئەمریکا لەسەر ئاگربەست ڕێککەوتن.

 

ئەوەی پێویستە بیزانیت: ڕێککەوتنەکە لە حەوت خاڵی سەرەکی پێکدێت، کە گرنگترینیان گەڕانەوەی دامەزراوە ئیداری و ئەمنییەکانی دەوڵەتە بۆ پارێزگاکە، تێکەڵکردنی چەکدارە ناوخۆییەکان لەگەڵ دەزگا ئەمنییەکان و ڕادەستکردنی چەکی قورس و مامناوەند لەلایەن عەرەبە بەدەوییەکان و دروزەکانەوە. هەروەها ڕێککەوتنەکە بەشداریپێکردنی درووزەکان لە داهاتووی سیاسیی وڵاتدا لەخۆدەگرێت.

 

لە هەمان کاتدا: لەگەڵ ڕاگەیاندنی ڕێککەوتنەکە، هێزە ئەمنییەکانی سووریا دەستیان کردووە بە جووڵە بەرەو سوەیدا بەمەبەستی جێبەجێکردنی خاڵەکان و کۆنترۆڵکردنی دۆخی ئەمنی.

 

ئەمەش بزانە: پێشتر سەرۆکایەتیی سووریا تووندوتیژییەکانی خستبووە ئەستۆی "گرووپە چەکدارە لە یاسا دەرچووەکان" و جەختی لەوە کردبووەوە کە پێویستە هەمووان لەژێر چەتری یاسادا بن بۆ پاراستنی ئارامی و سەقامگیریی ناوچەکە.

 

باکگراوند: لە ڕۆژی یەکشەممە ڕابردووەوە 14-7-2025، شەڕ و پێکدادان لەنێوان خێڵە بەدەوییەکان و چەکدارانی دروز ڕووی دا، دوای سێ ڕۆژ سوپای سووریا بۆ کۆتاییهێنان بە شەڕەکە چووە نێو شارەکە، بەڵام چەکدارانی سەر بە دیمەشق "سووکایەتی و بێڕێزییان بە درووزەکان کرد، ئەمە وێڕای کوشتنی دەیان چەکداریان".