هاکان فیدان و مارکۆ ڕووبیۆ دۆخی سوەیدا تاوتوێ دەکەن: دەبێت گرژییەکان ڕابگیرێن

ئاڤا نیوز

 

هاکان فیدان، وەزیری دەرەوەی تورکیا و مارکۆ ڕووبیۆ، وەزیری دەرەوەی ئەمریکا لە پەیوەندییەکی تەلەفۆنیدا دوایین پێشهاتەکانی دۆخی سووریایان تاوتوێ کرد. هەردوولا جەختییان کردەوە، پێویستە دەستبەجێ کۆتایی بە شەڕ و گرژییەکانی باشووری سووریا بێت.

 

وێنە گەورەکە: دوای نزیکەی هەفتەیەک لە شەڕ و پێکدادانی نێوان خێڵە بەدەوییەکان و چەکدارانی دروز لە سوەیدای سووریا، دواجار نێردەی ئەمریکا بۆ سووریا، ڕایگەیاند، بنیامین نەتانیاهۆ، سەرۆکوەزیرانی ئیسرائیل و ئەحمەد شەرع، سەرۆککۆماری سووریا بۆ قۆناغی ڕاگوزەر بە پشتیوانی ئەمریکا لەسەر ئاگربەست ڕێککەوتن.

 

ئەوەی پێویستە بیزانیت: ئەم پەیوەندییە تەلەفۆنیەی فیدان و ڕووبیۆ لە چوارچێوەی هەوڵە دیپلۆماسییەکانی تورکیایە بۆ هێورکردنەوەی دۆخی سووریا و ئاگربەستی سوەیدایە.

 

لێدوانی فەرمی: هاکان فیدان بە هاوتا ئەمریکییەکەی گوت، دەستوەردان و هێرشەکانی ئیسرائیل بۆ سەر باشووری سووریا بەزاندنی سەروەریی خاکی سووریا و تێکدانی یەکپارچەیی وڵاتەکەیە، کە زیان بە سەقامگیریی ناوچەکە دەگەیێنێت.

 

فیدان ئاماژە بۆ ئەوە دەکات کە ئەوان وەک تورکیا، "ڕێگە نادەن ڕێکخراوە تیرۆرستییەکان سوود لەم دۆخەی سووریا وەربگرن".

 

لەلایەکی دیکە: بەگوێرەی ڕاگەیێنراوی وەزارەتی تەندروستیی سووریا، پلانی فریاکەوتنی تەندروستییان کارا کردووە و تا ئێستا پێشوازییان لە 1698 بریندار کردووە کە 425 یان دۆخیان سەخت بووە. بەپێی ئاماری فەرمیی وەزارەتەکە، ژمارەی کوژراوەکانیش گەیشتووەتە 260 کەس.

 

بۆچوونی لایەنی بەرامبەر: مارکۆ ڕووبیۆ ئامادەیی وڵاتەکەی بۆ هەموو جۆرە پشتیوانییەکی تورکیا بۆ کۆتاییهێنان بە شەڕ و پێکدادانەکانی سووریا دەربڕی و بە پێویستی زانی، "خەڵكی سووریا ئەم دەرفەتەی ئێستا بقۆزنەوە بۆ بونیاتنانی داهاتووی وڵاتەکەیان".

 

بەتەنیشت ئەم بابەتەوە: لە بەشێکی دیکەی پەیوەندییە تەلەفۆنییەکەدا پرسی ئاگربەستی هەمیشەیی غەززە باس کرا. فیدان جەختی کردەوە لەوەی پێویستە ئاگربەست لە غەززە بکرێت و لەڕێگەی دەروازەکان هاوکاریی مرۆیی بگەیێنرێتە خەڵکی غەززە.