شازادەیەکی سعوودیە دوای 21 ساڵ لە بێهۆشی گیانیلەدەستدا

ئاڤا نیوز

وەلید بن خالید بن عەبدولعەزیز ئەو گەنجەی سعوودیەی لە ساڵی 2005ەوە بە ڕووداوێکی هاتووچۆ بێهۆشبوو، دوای 21 ساڵ مانەوەی لە بێهۆشیدا، ئەمڕۆ شەممە گیانی لەدەستدا.


چیرۆکی سەرەکی: شازادە وەلید بن خالید بن تەڵاڵ بن عەبدولعەزیز، یەکێک لە ئەندامانی خێزانی پادشایەتی سعوودیەبوو، ناوبراو ساڵی 2005 تووشی ڕووداوێکی هاتووچۆبوو و لەو کاتەشەوە تا ئەمڕۆ لە دۆخی بێهۆشیدا مابووەوە، وەلید 18ی نیسانی ئەمساڵ تەمەنی بوو بە 36 ساڵ.

ڕاگەیێنراوی فەرمی: خالید بن تەڵاڵ بن عەبدولعەزیز، باوکی شازادە وەلید لە هەژماری فەرمی خۆی لە تۆڕی کۆمەڵایەتی ئێکس، مردنی کوڕەکەی دوای 21 ساڵ لە بێهۆشی ڕاگەیاند.

باوکی وەلید ئاشکراشی کرد کە ئێوارەی سبەی یەکشەممە ڕێوڕەسمی بە خاکسپاردنی کوڕەکەی لە ڕیازی پایتەختی سعوودیە بەڕێوەدەچێت.

باوکی وەلید هەمیشەو چاولەڕێگای گەڕانەوەی کوڕەکەی بوو و سەرەتای ئەمساڵ لە پەیامێکدا لەگەڵ بڵاوکردنەوەی وێنەی خۆیی و کوڕەکەی ڕایگەیاندبوو، "داواکارم خوای گەورە لەگەڵ ساڵی نوێ تۆمان پێ ببەخشێتەوە".