ئەحمەد شەرع مێزەکەی بەسەر درووزەکان و ئیسرائیل هەڵگەڕاندەوە

ئاڤا نیوز

دوای ئەوەی چەکدارە دروزییەکان لە شاری سوەیدا بە پاڵپشتی ئیسرائیل دژی سوپاو هێزە ئەمنییەکانی حکومەتی سووریا وەستانەوە، هێزە فەرمییەکان ناچار بوون لە سوەیدا بکشێنەوە. ئەحمەد شەرع هەر سوور بوو لەسەر ئەوەی کە سوەیدا کۆنترۆڵ بکات، لەژێر ناوی هێزە عەشایەرییەکان چوویەوە ناو سوەیدا.

چیرۆکی سەرەکی: ماوەی چەند ڕۆژێک بوو شەڕ و ئاڵۆزی لە نێوان هێزە ئەمنییەکان و چەکدارانی دروز لە شاری سوەیدا دروست بوو، بۆ هێورکردنەوەی دۆخەکە، حکومەتی سووریا بڕیاری ناردنی هێزی ئەمنی دا بۆ ناوچەکە، ئەمەش نیگەرانی ئیسرائیلی لێکەوتەوە و هێرشی کردە سەر سوپای سووریا.

چی ڕوویدا: سەرۆک هۆزەکانی سووریا کۆنگرەیەکیان کرد، بڕیاریان دا هەتا سوەیدا نەوەستن، هەزاران چەکدار کە هەر ئەندامانی هێزە ئەمنییەکانی سووریان، بەڵام جلی چەکداری هۆزەکانیان لەبەر کردووە، بە ئۆتۆمبێلی هێزە ئەمنییەکانەوە بۆیاخیان دەکەن و بەرەو سوەیدا بەڕێ دەکەون. 

چەکدارە دروزەکان ترسان ئەم هەموو چەکدارە بەرەو شارەکەیان دەڕۆن، و نزیک بوونەتەوە لێیان، ناچار ئاگربەست و ڕێککەوتنیان ڕاگەیاند، داوایان لە حکومەت کردەوە با هێزە ئەمنییەکان بێنەوە باشترە لە چەکداری هۆزەکان.

لێدوانی فەرمی: ئەحمەد شەرع، سەرۆککۆماری سووریا ڕایگەیاند، " هەر کەسێک پێشێلی ئەم ڕێککەوتنە بکات، سەروەری پێشێل کردووەو ڕووبەڕووی دەبینەوە".

ژمارەکان وادەڵێن: لە ئەنجامی شەڕ و ڕووبەڕووبوونەوەی هێزە ئەمنییەکان و چەکدارە دروزییەکان لەماوەی هەفتەیەکا 718 کەس کوژراون.