باجی هەر سەرکەوتنێک.. سزایەکی نوێیە !!

ئاڤا نیوز

پاش بگرەو بەردەو دەستی دەستی و کات کووشتنێکی خەمساردانەی نا ئینسانی و نا شارستانی، دەستەڵاتدارانی بەغدا، ڕادەستکردنی بڕێکی زۆر نەوت و هەناردەکردنی لەڕێی سۆمۆیان کردە  مەرجێکی سەرەکیی ڕێککەوتن. سەرۆک و ئەندامانی ئەنجومەنی وەزیرانی هەرێمیش بۆ کەمکردنەوەی فشاری سەر ژیان و بژێویی خەڵکی کوردستان، لەسەر ڕاسپاردەی بەڕێز بافڵ تاڵەبانی و یاوەرانی، نەرمییان نواند و ئەو مەرجە و هەندێ مەرجی نادادپەروەرانەی دیکەیشیان قبووڵکرد. هاوکات لە ماوەی ئەو دانوستاندنە سەختەدا کە دوو مانگ زیاتری خایاند، ناحەزان بەچاوپۆشی و دەستلەپشتدان و زەمینە بۆ خۆشکردن، شەقاوە و لەیاسا دەرچووکانی خۆیان ڕاسپارد درۆنبارانی کۆمپانیا و چاڵگە و کێڵگەکانی بەرهەمهێنانی نەوتی کوردستان بکەن و پەکیان بخەن. 

چوار ڕۆژ لەمەوبەر حکومەتەکەی سودانی و تەیف سامی، واژۆیان لەسەر ڕێککەوتننامەیەک لەگەڵ حکومەتی هەرێمی کوردستان کرد و خەڵکی کوردستانیش پاش 90 ڕۆژی سەخت، خۆیان ئامادەکردبوو  لای کەمیی مووچەی مانگی پێنج وەربگرن، کەچی ئەمڕۆ  هاوکات و درووست و ڕێک لەگەڵ ڕاگەیاندنی سەرکەوتنێکی تر و تەواوبوون و خستنە گەڕی پرۆژەیەکی ستراتیژیی گەیاندنی ئاوی پاکژ بۆ ناو شاری هەولێر، بێ پرس و ڕا، بە ساختەکاری مەرجێکیان بۆ ڕێکەوتنەکە زیادکرد، بۆ ئەوەی چەند هەفتەیەکی تریش درێژە بە سزادانی بە کۆمەڵی خەڵکی کوردستان بدەن! 

کورت و پوخت:  ئیتر کاتی ئەوە هاتووە هەموو لایەکمان لەو ڕاستییە تێبگەین کە لەگەڵ بەدەستهێنانی هەر سەرکەوتنێکدا لە کوردستانی بێ بوودجە و گەمارۆدراودا، دەستەڵاتدارانی ملیاردێر و گەندەڵی شکستخواردووی بەغدا، داهێنان دەکەن لە دۆزینەوەی ڕێگەیەکی نوێ بۆ سزادانی خەڵکی کوردستان! 
ئیتر با بەس بێ قیڕە قیڕی وەرگێڕ و وتەبێژو خۆفرۆشانی خاوەن بەرژەوەندیی بەناو کورد لە بەغدا!!