کارمەندێکی هاتووچۆ لەسەر دزینی زیاتر لە 10 ملیار دینار سزای زیندانی هەتاهەتایی بۆ دەردەکرێت

ئاڤا نیوز

دەستەی دەستپاکیی عێراق ڕایدەگەینێت، لەسەر دزینی زیاتر لە  10 ملیار دینار سزای زیندانی تا هەتایی بۆ کارمەندێکی پێشووی بەڕێوەبەرایەتی گشتیی هاتووچۆ دەردەکرێت.

وێنە گەورەکە: دیاردەی گەندەڵی لە دوای ساڵی 2003ـەوە لە عێراق لە هەموو دامەزراوەکانی حکومەت بڵاوبووەتەوە، دەستەی دەستپاکیش ماوە ماوە دۆسییە گومانلێکراوەکان هەڵدەداتەوە، دواتریش دۆسییەکان ئاراستەی دادگا دەکات.

ڕاگەیێنراوی فەرمی: بەگوێرەی ڕاگەیێنراوێک، دەستەی دەستپاکی ئاماژەی بەوە کرد کە دادگای تاوانەکانی ڕەسافە دوو بڕیاری سزای لە دۆسیەی کارمەندەکەی پێشووی بەڕێوەبەرایەتیی گشتیی هاتووچۆ دەرکردووە، کە دەستەکە دوای دەستگیرکردنی، لێکۆڵینەوەی تێدا کردبوو. ڕوونیکردەوە کە دادگاکە دوو بڕیاری سزادانی ئامادەکارانەی بە زیندانیی هەتاهەتایی دەرکردووە و تۆمەتبارەکەی ناچار کردووە بە گەڕاندنەوەی بڕە پارە دزراوەکە کە دەکاتە 10 ملیار و 446 ملیۆن و 442 هەزار دینار.

لەلایەکی دیکەوە: دەستەکە لە پێنجی ئازاردا ڕایگەیاندبوو کە ئۆپەراسیۆنێکی تایبەتی ئەنجام داوە و تێیدا دەستی بەسەر بڕی سێ ملیار و 390 ملیۆن دیناری عێراقیدا گرتووە، کە بەشێک بووە لەو پارە دزراوانەی بەڕێوەبەرایەتیی گشتیی هاتووچۆ. پارەکە لەلایەن چوار تۆمەتباری خزمی سزادراوەکەوە لەگەڵ پێنج کیلۆگرام زێڕ لەناو جانتای گەشتکردندا لە خانوویەکی چۆڵکراوی یەکێک لە گەڕەکەکانی بەغدای پایتەختدا شاردرابووەوە.