ئاژانسی نێودەوڵەتیی وزەی ئەتۆم: ئێران ئامادەیە دانوستاندنەکان دەستپێبکاتەوە

ئاڤا نیوز

بەڕێوەبەری گشتی ئاژانسی نێودەوڵەتیی وزەی ئەتۆمی ئامادەیی ئێرانی بۆ دەستپێکردنەوەی "گفتوگۆ تەکنیکییەکان" سەبارەت بە بەرنامە ئەتۆمیەکەی ڕاگەیاند.

وێنە گەورەکە: دوای جەنگی 12 ڕۆژەی ئێران و ئیسرائیل، نێوانی ئێران و ئاژانسی نێودەوڵەتیی وزەی ئەتۆم و بەتایبەتی لەگەڵ بەڕێوەبەری ئاژانسەکە تێکچوو، ئێران هەموو جۆرە قسە و دانوستان و کۆبوونەوەیەکی لەگەل ئەم ئاژانسە هەڵپەسارد.

لێدوانی فەرمی: ڕافائیل گرۆسی، بەڕێوەبەری گشتی ئاژانسی نێودەوڵەتیی وزەی ئەتۆمی ڕایگەیاند، ئێران ئامادەیی خۆی دەربڕیوە بۆ دەستپێکردنەوەی هەندێک لە دانوستانەکان لەسەر ئاستی تەکنیکی، ئاماژەی بەوەشدا دانوستانەکانی نێوان ئاژانسی نێودەوڵەتیی وزەی ئەتۆم و ئێران دەکرێت بە گفتوگۆکردن لەسەر وردەکارییە تەکنیکییەکان دەستپێبکات و پاشان بەرەو دانوستانەکانی ئاستێکی بەرزتر بڕوات.

زانیاریی زیاتر: گرۆسی جەختی لەوە کردەوە که دەستپێکردنی وتووێژ لەگەڵ ئێران لەبارەی چۆنیەتی دەستپێکردنەوەی سەردانەکان گرنگه.

ئەوەی پێویستە بیزانیت: دەستپێکردنەوەی دانوستان و گفتوگۆکانی نێوان ئێران و ئاژانسی وزەی ئەتۆم لە کاتێکدایە کە ئەمڕۆ هەینی کۆبوونەوە و گفتوگۆی وڵاتانی فەرەنسا، بەریتانیا و ئەڵمانیا لەگەڵ ئێران لە ئیستەنبووڵ دەستپێکردەوە.