هاکان فیدان: ڕێککەوتنی هەسەدە و حکومەتی سووریا گرنگە

ئاڤا نیوز

تورکیا داوا دەکات هەسەدە لەگەڵ حکومەتی سووریا بگاتە ڕێککەوتن، وەزیری دەرەوەی تورکیاش دەڵێت، وەک چۆن بۆ خۆمان ئاسایش و سەقامگیریمان دەوێت، بۆ سووریا و وڵاتانی دیکەی دراوسێش هەمان شتمان دەوێت.

وێنە گەورەکە: تورکیا سوورە لەسەر جێبەجێکردنی ڕێککەوتنی 10ـی مانگی ئازاری نێوان حکومەتی سووریا و هێزەکانی سووریای دیموکرات (هەسەدە).

لێدوانی فەرمی: هاکان فیدان، وەزیری دەرەوەی تورکیا ڕایگەیاند، زۆر گرنگە هەسەدە دەستبەجێ لەگەڵ حکومەتی سووریا بگاتە ڕێککەوتن و هەنگاوی ڕاستەقینە بۆ جێبەجێکردنی ڕێککەوتنەکەی نێوانیان لەگەڵ حکومەتی سووریا بنێت.

بەردەوام بوونی گرووپە چەکدارەکان بە بەکارهێنانی هەندێک بیانوو لە سووریادا قبوڵ ناکرێت، نامانەوێت چەک لە دەستی هیچ هێزێکی دەرەوەی دەوڵەتی سووریا بێت و چاوەڕوان دەکەین یەپەگە چەکەکانیان دابنێن.

زانیاریی زیاتر: هاکان فیدان وتیشی، وەکو چۆن بۆ خۆمان ئاسایش و سەقامگیریمان دەوێت، بۆ سووریا و وڵاتانی دیکەی دراوسێش هەمان شتمان دەوێت و ڕێگەنادەین هەمان سیناریۆی عێراق لە سووریاش دووبارە ببێتەوە.