ئاڤا کۆبوونەوەیەک لە نێوان شاندێکی چوارچێوەی هەماهەنگی و ئەمریکا ئاشکرا دەکات

ئاڤا نیوز

سەرچاوەیەکی سیاسیی لە بەغداوە زانیاری لەسەر کۆبوونەوەیەکی داخراو لەنێوان شاندێکی سەرکردەکانی چوارچێوەی هەماهەنگی و بەرپرسانی ئەمریکیدا ئاشکرا کرد، تێیدا باسی چارەنووسی گرووپە چەکدارەکانی عێراق کراوە، هاوکات ڕاپۆرتێکی ئەمریکیش وردەکاریی کۆبوونەوەکەی خستووەتەڕوو.

وێنە گەورەکە: بەپێی ڕاپۆرتێکی پەیمانگای ئینتەرپرایزی ئەمەریکی بۆ پڕۆژەی هەڕەشە مەترسیدارەکان، شاندێکی ئەمریکی لە بەغدا لەگەڵ سەرکردەکانی چوارچێوەی هەماهەنگیدا کۆبوونەتەوە و پەیامێکی کۆتاییان پێداون سەبارەت بە هەڵوەشاندنەوەی گرووپە چەکدارەکان، ئەگەرنا ڕووبەڕووی سیناریۆیەک دەبنەوە کە "ڕەنگە بەزەیی تێدا نەبێت".

ڕاگەیێنراوی فەرمی: پەیمانگاکە لە زاری سەرچاوەیەکی ئەمریکییەوە بەدووری زانی  ئەمریکا لە م کاتەدا بیر لە ئەنجامدانی هیچ هێرشێک دژی ئەو گرووپانە بکاتەوە، بەڵکو چاوەڕێی یەکلاییکردنەوەی بڕیاری کۆتایی لە دەسەڵاتدارانی عێراقەوە دەکات.


لەلایەکی دیکەوە: بەگوێرەی سەرچاوەیەکی سیاسیی نزیک لە چوارچێوەی هەماهەنگی، پێشنیازێکی عێراقی بۆ چارەسەری ئەم پرسە ئامادەیە و ڕەوانەی نەجەف و تاران کراوە ئەویش بریتییە لە:

•    هەڵوەشاندنەوەی گرووپە چەکدارەکان.

•    تێکەڵکردنی ئەندامەکانیان لەگەڵ هێزە ئەمنی و حکومییەکان.

•    پێدانی پۆستی باڵا لە حکومەتی عێراق بە سەرکردەکانیان.

ئەمەش بزانە: جێبەجێکردنی ئەم پێشنیازانە، لەسەر ڕەزامەندی نەجەف و تاران وەستاوە.