چوارچێوەی هەماهەنگی: بەکارهێنانی چەک لە دەرەوەی دەسەڵاتی دەوڵەت ڕەت دەکەینەوە

ئاڤا نیوز

چوارچێوەی هەماهەنگی، هێرشەکەی سەر یەکێک لە بەڕێوەبەرایەتییەکانی وەزارەتی کشتوکاڵی سەرکۆنە کرد و جەختی کردەوە کە بەکارهێنانی چەک لە دەرەوەی چوارچێوەی فەرمیی دەوڵەت ڕەت دەکاتەوە.

چیرۆکی سەرەکی: سەرلەبەیانی ئەمڕۆ یەکشەممە لە بەغدا و لەکاتی دەستبەکاربوونی بەڕێوەبەری یەکێک لە فەرمانگەکانی وەزارەتی کشتوکاڵ، ژمارەیەک چەکدار سەر بە هێزەکانی حەشدی شەعبی دەوری باڵەخانەکە دەدەن، دواتریش هێزێکی وەزارەتی ناوخۆ دەگاتە شوێنەکە و شەڕ و ڕووبەڕوبوونەوە لەنێوان هەردوولادا دروستدەبێت.

کاردانەوەکان: چوارچێوەی هەماهەنگی، کە لایەنە شیعییەکانی پێکهێنەری حکومەت لەخۆدەگرێت، کۆبوونەوەیەکی بەپەلەی سەبارەت بە پێشهاتە ئەمنییەکانی بەغدا کرد و پشتیوانیی خۆی بۆ هەموو ڕێکارە یاساییەکانی حکومەت بۆ سەپاندنی ئاسایش و پاراستنی شکۆی دەوڵەت ڕاگەیاند.

ڕاگەیێنراوی فەرمی: بەگوێرەی ڕاگەیێنراوی نووسینگەی ڕاگەیاندنی چوارچێوەکە، چوارچێوەی هەماهەنگی هێرشەکەی سەر یەکێک لە بەڕێوەبەرایەتییەکانی کشتوکاڵ سەرکۆنە دەکات و بە "دەرچوون لە یاسا و ڕێکارەکانی دەوڵەت"ـی لەقەڵەمدا.

پشتیوانیی خۆی بۆ هەموو ڕێکارە دادوەری و حکومییەکان دەربڕی بەمەبەستی سەپاندنی ئاسایش، جێبەجێکردنی یاسا و پاراستنی شکۆی دەوڵەت.

لەلایەکی دیکەوە: چوارچێوەی هەماهەنگی جەختی لەسەر "ڕەتکردنەوەی بەکارهێنانی چەک لە دەرەوەی چوارچێوەی فەرمی" کردەوە و داواشی لە لایەنە پەیوەندیدارەکان کرد لێکۆڵینەوەیەکی شەفاف و ورد بەپێی چوارچێوە یاساییەکان ئەنجام بدەن و هەموو ئەو کەسانە سزا بدەن کە تێوەگلانیان دەسەلمێنرێت.