دوو سایدکردنی گەڕەکی ژینی هەولێر دەستپێدەکاتەوە

ئاڤا نیوز 

دوای ئەوەی لەماوەی ڕابردوودا دووجار ئاڤا لەسەر تەواونەکردنی دوو سایدی گەڕەکی ژینی هەولێر بەدواداچوونی کرد، ئەم چەند ڕۆژە کێشەکەیان چارەسەر بوو، بەڵێندەرەکە ئەمڕۆ سێشەممە دەستبەکار دەکاتەوە.

وێنە گەورەکە: ماوەی 11 ساڵە حکومەتی عێراق بودجەی هەرێمی کوردستانی بڕیووە و بەو هۆیەوە ژمارەیەکی زۆری پڕۆژە وەستاوەن، لەگەڵ ئەوەشدا بەشێک لە پڕۆژە ستراتیژی و خزمەتگوزارییەکان لە هەرێمی کوردستان لەسەر داهاتی ناوخۆ جێبەجێ دەکرێن.

لێدوانی فەرمی: مەریوان حاکم هادی، بەڕێوەبەری گشتی شارەوانییەکانی هەولێر بە ئاڤا میدیای وت،  ساڵێک زیاترە دوو سایدکردنی گەڕەکی ژینی هەولێر وەستاوە، ئەمڕۆ بەڵێندەر دەست بەکارەکانی دەکاتەوە. تا قیرتاوکردنی ناوەستێ. 

ئەوەی پێویستە بیزانیت: ئەم دوو سایدە دەکەوێتە ڕێگای دارەتوو بۆ گەڕەکی ژین. گوژمەی پڕۆژەکە دوو ملیار و 800 ملیۆن دینارە. درێژی شەقامەکە دوو کیلۆمەتر و نیوە.

بۆچی گرنگە: گرنگی ئەم دوو سایدە بۆ خەڵکی ناوچەکە ئەوەیە سێ هەزار یەکەی نیشتەجێبوونی لەسەرە و ڕێگای قیرتاو دەگاتە دوورترین شوێنی نیشتەجێبوون لە ڕۆژهەڵاتی هەولێر.