سوودانی بڕیاری پێکهێنانی لیژنەیەک بۆ ڕووداوەکەی بەغدا دەکات

ئاڤا نیوز

دوای دەستگیرکردنی بەڕێوەبەری پێشووی کشتوکاڵی کەرخ، سوودانی فەرمانی بە پێکهێنانی لیژنەیەکی لێکۆڵینەوە کرد کە چەند بەرپرسێکی باڵای حکومەتەکەی لەخۆدەگرێت. 

وێنە گەورەکە: وەزارەتی ناوخۆی عێراق دەستگیرکردنی بەڕێوەبەری پێشووی فەرمانگەی کشتووکاڵی کەرخی بەغدای ڕاگەیاند، بەهۆی ئەوەی ڕۆڵی ڕاستەوخۆی هەبووە لە شەڕ و پێکدادانەکەی ڕۆژی یەکشەممەی ڕابردووی نێوان هێزەکانی پۆلیس و هێزێکی سەر بە حەشدی شەعبی.

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق ڕایگەیاند: لیژنەکە بە سەرۆکایەتیی جێگری سەرۆکی دیوانی چاودێریی دارایی و بە ئەندامێتیی نوێنەرانی دەستەی دەستپاکی فیدراڵی و نووسینگەی سەرۆک وەزیران پێکدێت، بۆ وردبینی کردن لەو ناحەقیانەی کە بەرامبەر جووتیارانی ناوچەی دوڕە و دەورووبەری پارێزگای بەغدا کراون.

لیژنەکە دەبێت ئەنجامی لێکۆڵینەوەکانی بۆ نووسینگەی سەرۆکوەزیران بەرزبکاتەوە، بۆ ئەوەی ڕێکاری یاسایی پێویست بگیرێتەبەر دژی هەر حاڵەتێکی دەستدرێژیکردن یان دەستبەسەراگرتنی نایاسایی زەوییە کشتوکاڵییەکانی جووتیاران.

ئەمەش بزانە: ڕۆژی یەکشەممەی ڕابردوو 26-7-2025 لەسەر گۆڕینی بەڕێوەبەری فەرمانگەیەکی کشتووکاڵی لە بەغدا، شەڕ و پێکدادان لەنێوان هێزەکانی وەزارەتی ناوخۆی عێراق و ژمارەیەک چەکداری لیواکانی 45 و 46ی حەشدی شەعبی ڕوویدا، ئەم دوو لیوایە ئەندامەکانی سەر بە حیزبووڵڵای عێراقی بوون و بەشێکیان دەستگیرکراون.