قایمقامی هەولێر: ئامادەکارییەکان بۆ پێشوازیکردن لە زیارەتکارانی ئێرانی تەواوکراون

ئاڤا نیوز

پارێزگای هەولێر ئامادەکارییەکانی بۆ پێشوازیکردن لە زیارەتکارانی ئێرانی تەواو کردوون، قایمقامی هەولێر لەوبارەیەوە دەڵێت"هەموو خزمەتگوزارییەکانیان بەخۆڕای دەبن".

وێنە گەورەکە: ئەمڕۆ 30-7-2025، هاتنی زیارەتکارانی ئێرانی بۆ بەشداریکردن لە چلەی ماتەمینی ئیمام حوسێن لە دەروازە سنوورییەکانی حاجی ئۆمەران و باشماخ بۆ کەربەلا دەستپێدەکات.

لێدوانی فەرمی: نەبەز عەبدولحەمید، قایمقامی هەولێر بە ئاڤا میدیای وت: لە پارێزگای هەولێر کۆبوونەوەی خۆمان لەگەڵ لایەنە پەیوەندیدارەکان ئەنجامداوە، هەروەها لیژنەکان ئامادەکارییەکانیان تەواو کردووە، لەگەڵ کۆماری ئیسلامی ئێرانیش هەماهەنگی بۆ پێشوازیکردن لە زیارەتکاران کراوە.

- پلانی ئەمنی، خزمەتگوزاری، تەندروستی دانراوە، هەموو خزمەتگوزارییەکان بۆ زیارەتکارەکان بەخۆڕاییە.

- لە دەروازەی حاجی ئۆمەران هەزار و 500 پاس بۆ گواستنەوەی زیارەتکاران تا هەولێر دانراوە، خەرجییەکەیان لەسەر حکومەتی هەرێمی کوردستان دەبێت.

- زیارەتکاران لە پێشانگای نێودەوڵەتی هەولێر لە پارکی سامی عەبدولڕەحمان پێشوازییان لێ دەکرێت، هەروەها خواردن و ئینتەرنێتیان بە خۆڕایی پێ دەدرێت.

- لە هەولێر هەزار و 800 پاسی دیکە بۆ گواستنەوەی زیارەتکاران دابین کراوە.

- پۆلیسی هاتووچۆ لە دەروازەی سنووری حاجی ئۆمەران لەگەڵ زیارەتکارەکان دەبن، تا ئەو کاتەی لە شاری هەولێر دەردەچن.

- تیمە ئەمنییەکانی پۆلیس و ئاسایش هەموو ئامادەکارییەکیان بۆ پاراستنی زیارەتکارانی ئێرانی کردووە.

زانیاریی زیاتر: بۆ چوارەمین ساڵە لە هەرێمی کوردستان پێشوازی لە زیارەتکارانی ئێرانی بۆ بەشدریکردن لە چلەی ماتەمینی ئیمام حوسێن دەکرێت.

ئەوەی پێویستە بیزانیت: چلەی ماتەمینی ئیمام حوسێن ئەمساڵ دەکەوێتە 14-8-2025ەوە.