ئیسرائیل بنکەیەکی سوپای سووریا بۆردومان دەکات؛ "بڕیاربوو بکرێتە بنکەیەکی تورکیی"

ئاڤا نیوز

بۆ سێیەمجار لەم مانگەدا، درەنگانێکی شەوی ڕابردوو ئیسرائیل بنکەیەکی سەربازی سوپای سووریای لە پارێزگای لازقیەی ڕۆژئاوای وڵاتەکە بۆردومان کرد، دەوترێت بڕیاربوو ئەم بنکەیە بکرێتە بنکەیەکی تورکیا لە پارێزگا کەناراوییەی سووریا.

وێنە گەورەکە: لە سەرەتای ڕووخانی دەسەڵاتەکەی ئەسەدەوە لە کۆتایی ساڵی ڕابردوو، ئیسرائیل بەچڕی ژێرخانی سەربازی سووریای کردووەتە ئامانج و لە قۆناغی یەکەمدا توانای ئاسمانی وڵاتەکەی پەکخست، هاوکات ئیسرائیل مەرجی ئەوەشی داناوە کە هێزەکانی سووریا نابێت لە ناوچە سنوورییەکانی باشووری وڵاتەکەیان نزیک ببنەوە، چونکە ئەو ناوچەیە لەلایەن ئیسرائیلەوە کۆنتڕۆڵکراوە.

زانیاریی بەدەستهاتوو: میدیاکانی سووریا بڵاویانکردەوە، درەنگانێکی شەوی ڕابردوو بارەگای لیوای 107 لە گوندی زاما لە دەوروبەری شارۆچکەی جبلەی پارێزگای لازقییە بۆردوومانکراوە، ئەوەش سێیەمجارە لەم مانگەدا ئەو بنکەیە دەکرێتە ئامانج.

زانیاریی زیاتر: پێشتر سەرچاوە ناوخۆییەکان و چالاکوانانی سووریا لە تۆڕە کۆمەڵایەتییەکان باسیان لەوەکردبوو، بنکەی سەربازی زاما ئامادە دەکرێت بۆ ئەوەی بکرێتە بنکەیەکی سەربازی تورکیا لە پارێزگا کەناراوەکانی سووریا.