ئۆکراینا پەیوەندییە بازرگانییەکانی لەگەڵ هەرێمی کوردستان دەستپێدەکاتەوە

ئاڤا نیوز

سەرۆکی یەکێتی هاوردە و ناردنکارانی هەرێمی كوردستان ڕایگەیاند، پەیوەندییە بازرگانییەکانیان لەگەڵ ئۆکراینا پتەوتر دەکەن.

ئەوەی پێویستە بیزانیت: ڕۆژی سێشەممە 26-03-2024، باڵیۆزی ئۆکراینا لە عێراق و سەرۆکی هاوردە و ناردنکارانی هەرێمی کوردستان کۆبوونەوە، دەستپێکردنەوە و پتەوکردنی ئاڵوگۆڕە بازرگانییەکان گفتوگۆی لەسەرکرا.

بۆچی گرنگە: ئۆکراینا لە پاڵ بەشێکی وڵاتانی عەرەبی لە پلەی پێنجەمی ئەو وڵاتانە دێت کە زۆرترین ئاڵوگۆڕی بازرگانی لەگەڵ هەرێمی کوردستان هەیە.

لێدوانە فەرمییەکان: بەر لە جەنگی ڕووسیا و ئۆکراینا پەیوەندییەکی گرنگی بازرگانیمان  لەگەڵ ئۆکراینا هەبوو ، کاڵایەکی زۆری ئەو وڵاتە لە بازاڕەکانی هەرێمی کوردستان هەن، کە لەڕووی نرخ و کوالێتییەوە گونجاون. مستەفا شێخ عەبدولڕەحمان سەرۆکی یەکێتی هاوردە و ناردنکاران لە کۆنگرەیەكی ڕۆژنامەوانی وای گوت.

لە لایەکی دیکەوە: ئۆلیکساندەر بۆرفچینکۆڤ، باڵیۆزی ئۆکراینا لە عێراق گوتی: پەیوەندییە بازرگانییەکانی کوردستان و ئۆکراینا لەگەشەسەندندایە،  ئۆکراینا کارئاسانی تەواو  بۆ بازرگانان دەکات.

وێنە گەورەكە: لەسەرەتای جەنگی ڕووسیا و ئۆکراینا، جوڵەی بازرگانی نێوان ئۆکراینا و هەرێمی کوردستان بەشێوەیەکی بەرچاو کەمبووەتەوە. لە ئۆکراینا ماددەی وشککراو، گوێز، مێووژ و ماددەی پاککەرەوە هاوردەی هەرێمی کوردستان دەکرێن.