وەستایەک لە تەکیە: بەبێ بەرامبەر بەفرگر و ساردکەرەوەی ماڵە زیانلێکەوتووەکان چاک دەکەمەوە

ئاڤا نیوز

 

پێشکەشکاری ئاڤا میدیا، ژوان قەرەداغی لە ناحیەی تەکیە چاوپێکەوتنی لەگەڵ وەستایەکی چاککردنەوەی ئامێرە کارەباییەکان کردووە کە دەڵێت: هەر ماڵێک ئامێری سەلاجە و موجەمیدە -بەفرگر و ساردکەرەوە-ی بەهۆی لافاوەکەوە تێکچووە، بەبێ بەرامبەر بۆی چاک دەکەمەوە.

 

چیرۆکی سەرەکی: وەستا فەرهاد، لەکاتی ڕووماڵی ڕۆژنامەوانیی لە تەکیە، تیمی ئاڤای ئاگادار کردووەتەوە کە ئامادەیە خۆبەخشانە خزمەتی زیانلێکەوتووانی چەمچەماڵ، تەکیە، گۆپاڵە، باینجان و ناوچەکانی دیکە بکات، سوپاسی ئاڤا دەکات کە زۆر هاوکاریی لێقەوماوانی کردووە.

 

ناونیشان: وەستا فەرهاد دەڵێت، دوکانەکەم لە تەکیە، کۆڵانی بارەگای یەکگرتوو، بەرامبەر مارکێتی پێشمەرگەیە، خۆبەخشانە و بەبێ بەرامبەر خزمەتی ماڵە زیانلێکەوتووەکان دەکەم و چەند ئامێریان هەبێت بۆیان چاک دەکەمەوە لەسەر ئەرکی خۆم.

 

باکگراوند: پاش ئەوەی ئاڤا میدیا هەڵمەتی بۆ کۆکردنەوەی هاوکاریی و کۆمەك بۆ لێقەوماوانی لافاوەکەی چەمچەماڵ و چواردەوری ڕاگەیاند و هەڵمەتێکی میدیایی سەرپێخست، لەسەرجەم شار و شارۆچکەکانی کوردستان هەوڵەکان دەستیان پێکرد بۆ بەدەمەوەچوونی زیانلێکەوتووان، ئەوەش ڕۆحی پێکەوەیی گەشاندەوە و ناکۆکییەکانی پەراوێزخست، بە ئامانجی کەمکردنەوەی مەینەتییەکانی خەڵکە زیان لێکەوتووەکان.

 

ئەمەش بزانە: ئەو وەستا خۆبەخشە دەڵێت، من حەز دەکەم هاوئاهەنگ بم لەگەڵ ئەو خەڵک و هاو خەمیان بم و هاوکاریان بم لەم کاتەدا، بەڕاستی ئاڤا کارێکی کرد تا ئێستا بە هیچ میدیایەکی دیکە نەکراوە و دەستخۆشی لە خەڵکی سلێمانی و هەولێر و شارەکانی دیکەی هەرێمی کوردستان دەکات بۆ بەدەمەوەبوونی خەڵکی لێقەوماو.