پەرلەمانی عێراق لەسەر چەند پرۆژەیاسایەکی گرنگ کۆدەبێتەوە

ئاڤا نیوز

بڕیارە ڕۆژی شەممەی داهاتوو، پەرلەمانی عێراق دانیشتنی ئاسایی خۆی ئەنجام بدات و تێیدا دەنگ لەسەر چەند پرۆژەیاسایەک بدات و خوێندنەوەی دووەمیش بۆ هەندێکی دیکە بکات.

ڕاگەیێنراوی فەرمی: بەپێی ڕاگەیێنراوێکی فەرمی کە لەلایەن پەرلەمانی عێراقەوە دەرچووە، دانیشتنەکە کاتژمێر 1ـی پاشنیوەڕۆی ڕۆژی شەممە دەست پێدەکات و کارنامەی دانیشتنەکە چەندین پرۆژەیاسای گرنگ لەخۆدەگرێت.

زانیاریی زیاتر: لە دانیشتنەکەی پەرلەمان، دەنگ لەسەر پێشنیازە یاسای هەمواری دووەمی یاسای دامەزراوەی زیندانییە سیاسییەکانی ژمارە چواری ساڵی 2006، دەنگ لەسەر پرۆژەیاسای ئازادیی ڕادەربرین و گردبوونەوە و خۆپیشاندانی ئاشتییانە دەدرێت، هاوکات خوێندنەوەی دووەم بۆ پێشنیازە یاسای پاراستن و باشترکردنی ژینگە دەکرێت.

ئەوەی پێویستە بیزانیت: هاوکات، پرۆژەیاسایەکی دیکەی جێی مشتومڕ چاوەڕێی دەنگدان دەکات، ئەویش پرۆژەیاسای دەستەی حەشدی شەعبییە. سەرەڕای نیگەرانییەکانی ئەمریکا لە دەرچوواندنی، لیژنەی ئاسایش و بەرگریی پەرلەمان بڕیاریداوە پرۆژەیاساکە ئاراستەی سەرۆکایەتیی پەرلەمان بکات، تاوەکو لە دانیشتنەکانی داهاتوودا بخرێتە دەنگدانەوە.