باندێك بە هەشت هەزار حەبی ترامادۆڵ و 10 كیلۆگرام ماریجواناوە دەستگیر دەكرێن

ئاڤا نیوز

لە عێراق باندێكی نێودەوڵەتیی بازرگانیكردن بە ماددەی هۆشبەر ئاشكرا دەكرێن كە هەشت هەزار حەبی هۆشبەری ترامادۆڵ و 10 كیلۆگرام ماریجوانایان لێ گیراوە. هەوڵیان داوە لەڕێگەی كەسانی نێوەندگیرەوە ماددە هۆشبەرەكان ساغبكەنەوە.

ڕاگەیێنراوی فەرمی: بەگوێرەی ڕاگەیێنراوێکی ئاژانسی ئاسایشی نیشتمانیی عێراق كە وێنەیەكی دەست ئاڤا میدیا كەوتووە، ئاماژە بەوە كراوە، لە ئۆپەراسیۆنێكی ناوازە و جۆریدا، مەفرەزەكانی خزمەتگوزاریی سەر بە ئاسایشی نیشتمانی لە پارێزگای بەسرە، بەهەماهەنگی و هاوكاری هێزێكی سەر بە پاسەوانی سنوور، توانیویانە دوو تۆمەتباری بیانی دەستگیر بكەن، ئەوەش دوای چاودێری و بەداداچوونی تیمەكان كە لانیكەم 48 كاتژمێری خایاند. لەكاتی دەستگیركرنیاندا بڕی 10 كیلۆگرام ماددەی هۆشبەری جۆری ماریجوانایان لەلا بووە.

لەلایەکی دیکەوە: لە چەندین ئۆپەراسیۆنی هاوشێوەدا، یازدە تۆمەتباری خاوەن ڕەگەزنامەی بیانی جۆراوجۆر دەستگیر كراون، كە لەكاتی دەستگیركردنییان بڕێكی زۆر حەبی هۆشبەر لە جۆری ترامادۆڵیان لەلابووە، كە هەوڵیان داوە لەڕێگەی كەسانی نێوەندگیرەوە ماددە هۆشبەرەكان ساغبكەنەوە.

زانیاریی زیاتر: لەنێو تۆمەتبارە دەستگیركراوەكان، سێ بازرگانی ماددەی هۆشبەر هەن كە عێراقین و سەرجەمیان بەگوێرەی ماددەكانی 25 و 26 ـی یاسای بەرەنگاربوونەوەی ماددە هۆشبەر و كارتێكەرە عەقڵییەكان ژمارە 1 ـی ساڵی 2020 دەستگیركراون و خۆیان و ماددەی دەستبەسەرداگیراو ڕەوانەی دادگای لێكۆڵینەوەی تایبەتمەند كراون.