ڕۆژئاوای كوردستان كۆمەكی مرۆیی پێشكەش بە دانیشتووانی سوەیدا دەكات

ئاڤا نیوز

 

لە هەنگاوێكی ناوازە و كەموێنەدا، 55 تۆن خۆراك و پێداویستیی سەرەكیی بژێوی لە ڕۆژئاوای كوردستانەوە لەڕێگەی دیمەشقەوە بەرەو سوەیدا ڕەوانە دەكرێت.

 

ئەوەی پێویستە بیزانیت: بەگوێرەی ڕوانگەی سووری بۆ مافەكانی مرۆڤ، ئەمە یەكەمین كاروانی هاوكاریی مرۆییە كە لە ڕۆژئاوای كوردستانەوە، بەرەو دیمەشقی پایتەختی سووریا ڕەوانە دەكرێت تا بە دانیشتووانی لێقەوماوی ناوچەی سوەیدا بگات كە بەهۆی شەڕ و ناكۆكییەكانی ئەمدواییە، دووچاری سەختی و كەمی خۆراك و پێداویستی سەرەتایی بژێوی بووەتەوە.

 

ئەو مانایەی دەیگەیێنێت: ئەم دەستپێشخەرییە مرۆییە، بە هەماهەنگی لەگەڵ وەزارەتی كاروباری كۆمەڵایەتیی حكومەتی دیمەشق ئەنجامدراوە، وەك بەشێك لە هەوڵە بەرفراوانەكانی نیشاندانی تەبایی و یەكگرتوویی نێوان دیمەشق و ناوچەكانی ژێر حوكمڕانی هەسەدە لە باكوور و باكووری خۆرهەڵاتی سووریا.

 

بەهۆی تێکچوونی دۆخی ئەمنی و ئابووری و زیادبوونی پێویستی بە خزمەتگوزارییە سەرەتاییەکان، پارێزگای سوەیدا دۆخێكی سەختی بەخۆیەوە بینیوە، خێزانە زیانلێكەوتووەكانی پێویستی زۆریان بە خۆراك و ئارد و سووتەمەنی و پێداویستیە سەرەتاییەكانی دیكە هەیە و توانای كڕینی پێداویستییەكانیان گەیشتووەتە ئاستێكی سەخت و دژوار، بەردەوامی گەمارۆی سەپێنراو كاریگەری لەسەر جووڵەی بازرگانی و هاتنە ناوەوەی كاڵاكان بۆ شارەكە هەبووە.