ئەمریکا بە فارسی هۆشداریی بە هاووڵاتیانی دەدات: مەچن بۆ ئێران، مەترسیی دەستگیرکردنتان هەیە

ئاڤا نیوز

 

وەزارەتی دەرەوەی ئەمریکا، لە ڕێگەی بڵاوکراوەیەکەوە کە بە زمانی فارسی بڵاو کراوەتەوە، داوای لە هاووڵاتییانی کردووە بەهۆی زیادبوونی مەترسیی دەستگیرکردن، خۆیان لە گەشتکردن بۆ ئێران بەدووربگرن.

ڕاگەیێنراوی فەرمی: وەزارەتی دەرەوەی ئەمریکا ڕۆژی هەینی لە پەیامەکەیدا کە لە هەژماری فەرمیی خۆی بە زمانی فارسی بڵاوی کردووەتەوە، جەختی کردووەتەوە کە "پێویستە هاووڵاتییانی ئەمریکا لەم کاتەدا چاو بە پلانەکانیاندا بخشێننەوە و سەردانی ئێران نەکەن."

 

هۆکارە زانراوەکان: لە بڵاوکراوەکەدا هاتووە کە بەهۆی دۆخی ناجێگیری ناوچەکە و "دۆخی بێوێنەی ترس" لە ئێران، بەتایبەت دوای ڕووبەڕووبوونەوەکانی لەگەڵ ئیسرائیل، مەترسیی دەستبەسەرکردنی هاووڵاتییانی بیانی زیادی کردووە.

ئەوەی پێویستە بیزانیت: ئەم ئاگادارکردنەوەیەی واشنتن تەنها یەک ڕۆژ دوای ئەوە دێت کە ئیسرائیل لەبەر هۆکاری ئەمنی، سەرجەم دیپلۆماتکار و نوێنەرەکانی خۆی لە ئیمارات کشاندەوە.

 

باکگراوند: ڕۆژی 13-6-2025، ئیسرائیل هێرشی ئاسمانی چڕی بۆ سەر ناوجە جیاوازەکانی ئێران دەستپێکرد، هێرشەکان بوونە هۆی کوژرانی دەیان سەرکردەی سەربازی و زانای ئەتۆمیی ئەو وڵاتە. دواتریش ئەمریکا چەند پێگەیەکی ئەتۆمی ئێرانی بۆردومان کرد. دوای 12 ڕۆژیش بە نێوەندگیری ئەمریکا، تاران و تەلئەبیب ئاگربەستیان ڕاگەیاند.