وەزارەتی دارایی: 120 ملیارەکە ئامادەیە؛ کێشەی بەغدا ئێستا وەرگرتنی بڕی نەوتی بەرهەمهێنراوە

ئاڤا نیوز

وەزارەتی دارایی و ئابووریی هەرێمی کوردستان دوای ناردنی لیستی مووچەی مانگی حەوتی بۆ بەغدا لەبارەی ناردنی داهاتی ناوخۆ ڕوونکردنەوە دەدات و دەڵێت پارە ئامادەیە و کێشەی نەوت چارەسەر بوو دەینێرین. 

 

چیرۆکی سەرەکی: ئێستا لیستی مووچەی هەردوو مانگی شەش و حەوت لە بەغدایە، هاوشان لەگەڵ تەرازووی پێداچوونەوەی دارایی مانگی شەش. تیمەکانی وەزارەتی دارایی هەرێمی کوردستان سەرقاڵی ئامادەکردنی تەرازووی پێداچوونەوەی مانگی حەوتن تاوەکو پێش 15ـی مانگ بیدەنە بەغدا.

لێدوانی فەرمی: سەرچاوەیەک لە وەزارەتی دارایی و ئابووریی هەرێمی کوردستان بە ئاڤای ڕاگەیاند: داهاتی نانەوتی مانگی شەش کە بڕەکەی 120 ملیار دینارە، ئامادەیە بۆ ناردن، بەڵام کێشەی بەغدا ئێستا وەرگرتنی بڕی نەوتی بەرهەمهێنراوە، دەبێت بەغدا بەو بڕە ڕازی بێت کە ئێستا لە توانای کێڵگە نەوتییەکاندایە، کە ئەم کێشەیە چارەسەر بوو ناردنی پارەکە ئاسانە و ئامادەشە".

 

توانای بەرهەمهێنانی نەوتی هەرێمی کوردستان ئێستا نزیکەی 150 هەزار بەرمیلە لە ڕۆژێکدا. ئەگەر کێشە ئەمنییەکان چارەسەر بکرێن و دڵنیایی بدرێتە کۆمپانیاکان، پێشبینی دەکرێت ئاستی بەرهەمهێنان بەرزببێتەوە بۆ 280 هەزار بەرمیل، کە لەو بڕە 230 هەزار بەرمیلی دەدرێتە بەغدا.

ئەوەی پێویستە بیزانیت: ئەمڕۆ وادەی کارکردنی ئەو چوار لیژنە هاوبەشە کۆتایی دێت کە بۆ پرسی نەوت، داهاتی ناوخۆ، بودجە، و بەبانکیکردنی مووچە پێکهێنرابوون. ئاڤا زانیویەتی جگە لە لیژنەی نەوت، سێ لیژنەکەی تر سەردانی هەرێمی کوردستانیان نەکردووە و ڕوون نییە ڕاپۆرتەکانیان لەسەر چ بنەمایەک پێشکەش دەکەن. هەروەها، لیژنەی داهات و بودجە تا ئێستا هیچ کۆبوونەوەیەکی ئەنجام نەداوە.

 

لەلایەکی دیکە: دوێنێ، لیژنەیەکی پسپۆڕی بواری نەوت لە عێراقەوە سەردانی هەولێری کردووە بەمەبەستی ئامادەکردنی ڕاپۆرت لەسەر دوو بابەتی گرنگ:

1. لێکۆڵینەوە لە هێرشە درۆنییەکانی سەر کێڵگە نەوتییەکان.
2. هەڵسەنگاندنی توانای بەرهەمهێنانی بیرە نەوتەکان.

ئەوەی پێشبینی دەکرێت: هەفتەی داهاتوو بۆ یەکلاییکردنەوەی چارەنووسی مووچەی مانگی شەش و دەستپێکردنەوەی هەناردەی نەوتی کوردستان بە هەفتەیەکی چارەنووسساز دادەنرێت.