فایلی خەڵک؛ دوای بەدواداچوونی ئاڤا کارکردن لە پڕۆژەی دووسایدی گەڕەکی ژین لە دارەتوو دەستیپێکردەوە

ئاڤا نیوز

دوای ئەوەی ماوەیەک لەمەوبەر ئاڤا میدیا سکاڵای هاونیشتمانییانی گەڕەکی ژینی لە ناحیەی دارەتوو گەیاند، کە داوایان دەکرد کار لە پڕۆژەی وەستاوی شەقامی دووسایدی گەڕەکەکەیان بکرێت، ئەمڕۆ کارکردن لە پڕۆژەکەدا دەستیپێکردەوە و بەرپرسانی شارەوانیش بەڵێنی تەواوکردنی پڕۆژەکە پێش سەری ساڵ دەدەن.

چیرۆکی سەرەکی: ماوەیەک پێش ئێستا، لە سەعات حەوتی ئاڤا میدیا، داواکاریی دانیشتووانی گەڕەکی ژین خرایەڕوو، کە تێیدا ناڕەزایەتییان دەربڕیبوو بەرامبەر بە وەستانی کارکردن لە شەقامی سەرەکیی گەڕەکەکەیان و داوایان کردبوو چارەسەر بکرێت.

لێدوانی فەرمی: ڕەوەند قادر، بەڕێوەبەری شارەوانیی دارەتوو، بە ئاڤای ڕاگەیاند: "نزیکەی دوو مانگ پێش ئێستا، ئاڤا میدیا ڕاپۆرتێکی لەسەر شەقامی دووسایدی گەڕەکی ژینی دارەتوو بڵاوکردەوە، ئێمەش لەو کاتەدا بەڵێنماندا کە هەرچی لە تواناماندا بێت بۆ چارەسەرکردنی کێشەکە درێغی نەکەین."

بەڕێوەبەری شارەوانیی دارەتوو وتیشی: "دەرئەنجامی بەدواداچوونەکانمان، ئەمڕۆ یەکەم ڕۆژی دەستپێکردنەوەی پڕۆژەکەیە و هەموو هەوڵێکمان بۆ ئەوەیە کە پڕۆژەکە پێش هاتنی سەری ساڵ کۆتایی پێبێت و شەقامەکە بە ڕووی شۆفێران و هاونیشتمانییاندا بکرێتەوە."

بۆچی گرنگە: ئەم پڕۆژەیە جگە لەوەی خزمەتێکی گەورە بە دانیشتووانی گەڕەکی ژین و تەواوی دارەتوو دەکات، هاوکات سوودێکی زۆریشی بۆ ئەو فەرمانبەرانە دەبێت کە لەو سنوورە زەوییان وەرگرتووە، چونکە زەوییەکانیان دەکەونە سەر هەمان شەقام و ئەمەش هاتووچۆیان ئاسانتر دەکات.