شارەزایەکی ئابووری: لە عێراق شتێک نییە بەناوی "مووچە گەرەنتیکراوە"

ئاڤا نیوز

هەرچەندە بەرپرسانی حکومەت و پەرلەمانی عێراق دڵنیایی دەدەن لەوەی مووچەی فەرمانبەران گەرەنتیکراوە و هیچ گرفتێکی بۆ دروست نابێت، بەڵام شارەزایەکی ئابووریی دەڵێت، لە وڵاتدا شتێک نییە بەناوی "مووچە گەرەنتیکراوە" و ئەگەر پارەی نەوت هەبێت مووچەش هەیە، پارەی نەوت نەبێت مووچەش ڕاستەوخۆ دوادەکەوێت.

وێنە گەورەکە: داهاتی عێراق بەڕێژەی نزیکەی 90% پشتی بە فرۆشتنی نەوت بەستووە و مانگانە حکومەت ئەو پارەیەی لە فرۆشتنی نەوت دەستی دەکەوێت، مووچەی پێ دابەش دەکات و پارەی پڕۆژەکانیشی لێ دەدات، بەردەوامیش بەرپرسانی حکومەت و  پەرلەمان دەڵێن، مووچە گەرەنتیکراوە و هیچ گرفتێکی بۆ دروست نابێت.

لێدوانی فەرمی: نەبیل مەرسوومی، مامۆستای زانکۆ و شارەزای ئابووری ڕایگەیاند، لە عێراق شتێک نییە بەناوی "مووچە گەرەنتیکراوە"، بەڵکو شتێک هەیە ناوی داهاتی فرۆشتنی نەوتە، ئەگەر ئەو داهاتە بەشی مووچەی کرد ئەوە باشە و مووچە دابەش دەکرێت، ئەگەر بەشی مووچەشی نەکرد دەوڵەت قەرز لە بانکەکان دەکات، ئەگەر بانکەکانیش پارەیان تێدانەبوو دابەشكردنی مووچە دوادەکەوێت تا پارەی نەوت دەگات.

دەڵێت، تەنانەت با خانەنشینانیش دڵنیابن کە تاوەکو پارەی نەوت بۆ حکومەت نەگەڕێتەوە، مووچەکانیان وەرناگرن و هاوکێشەی مووچەش بەم شێوەیەیە: "نەوت هەبێت مووچەش هەیە، نەوت نەبێت مووچەش نییە".