نەتانیاهۆ بڕیاری داگیرکردنی غەززە دەدات

ئاڤا نیوز

بنیامین نەتانیاهۆ، سەرۆکوەزیرانی ئیسرائیل، بڕیار لەسەر داگیرکردنی یەکجاری و تەواوەتیی کەرتی غەززە دەدات.

چیرۆکی سەرەکی: میدیاکانی ئیسرائیل بڵاویان کردەوە نەتانیاهۆ بڕیاریداوە بۆ داگیرکردنی کەرتەکی غەززە ئۆپەراسیۆنێکی فراوانی سەربازی لە کەرتەکە ئەنجام بدات.
 

لەلایەکی دیکەوە: هەر لەسەر بڕیاری نەتانیاهۆ و بە مەبەستی جێبەجێکردنی بڕیارەکە، ئەیال زامیر، سوپاسالاری ئیسرائیل، گەشتەکەی بۆ ئەمریکا هەڵوەشاندووەتەوە.

ئەمەش بزانە: بە گوێرەی سەرچاوە میدیاییەکان بەرپرسانی سەربازیی ئیسرائیل بۆچوونیان لەگەڵ نەتانیاهۆ سەبارەت بەم بڕیارە جیاوازە و ناکۆکیی نێوانیان قووڵتر بووەتەوە. 

ئەوەی پێشبینی دەکرێت: بڕیارەکەی نەتانیاهۆ دەخرێتە بەردەم کابینەی جەنگی ئیسرائیل کە لە کۆتایی هەفتە ئەنجام دەدرێت و لەوێش پەسەند بکرێت. 

باکگراوند: نزیکەی دوو ساڵە ئیسرائیل هێرشی سەر غەززەی دەستپێکردووە بەڵام هێشتا نەیتوانیوە هیچ یەک لە سێ ئامانجەکانی بەدەست بهێنێت کە بریتی بوون لە: گەڕانەوەی بارمتەکان، تێکشکاندنی حەماس و دڵنیابوونەوە لەوەی کە غەززە نابێتە هەڕەشە بۆ سەر ئیسرائیل.