بانکی نیشتمانی هەرێمی کوردستان لە ئەمساڵدا کارا دەبێت

ئاڤا نیوز

ڕێکارە یاساییەکانی بانکی نیشتمانی لە هەرێمی کوردستان تەواوکراون و بەگوێرەی هەنگاوەکان کار لەسەر ئەوە دەکرێت پێش کۆتایی ئەمساڵ کارا بکرێت و ڕۆڵی بانکی ناوەندی لە هەرێمی کوردستان دەگێڕێت.

وێنە گەورەکە: بانکی نیشتمانی ڕاستەوخۆ سەر بە بانکی ناوەندیی عێراق دەبێت و بە سیستمێکی پێشکەوتوو کار دەکات. بەئەلیکترۆنیکردنی سیستمی دارایی لە کارە سەرەتاکانی دەبێت. هاوکات دەتوانێت دۆلار بۆ بازاڕەکانی دراوی کوردستان دابین بکات. هاندەرێکیشە بۆ ئەوەی سیستمی بانکی لە هەرێمی کوردستان هاوچەرخ و باوەڕپێکراو بێت، برەویش بە کەرتی بازرگانی دەدات.

لێدوانی فەرمی: بڵند محەممەد، بەڕێوەبەری گشتیی تۆماركردنی كۆمپانیاكان بە ئاڤای گوت، "بانکی نیشتمانی ڕۆڵی بانکی ناوەندی لە هەرێمی کوردستان دەگێڕێت، هەموو ڕێکارە یاساییەکان تەواوکراون دەستەی دامەزرێنەری بانکەکە دامەزراوە، ماوەتەوە سەر ئەوەی بانکەکە و لقەکانی لەسەرتاسەری هەرێمی کوردستان بکرێتەوە."

ئێستا خولێک کراوەتەوە بۆ دەوڵەمەندکردنی ئەزموونی ئەو فەرمانبەرانەی لەو بانکە دەوام دەکەن، بۆ ئەوەی یەکێک بێت لە باشترین بانک لە سیستمی بانکە جیهانییەکان.

بۆچی گرنگه‌: پێدانی قەرز و پێشینە بە هاونیشتمانیان کاریگەری دەبێت لەسەر گەشەپێدانی پرۆژە ئابوورییە بچووکەکان و ڕەخساندنی هەلی کار بۆ گەنجان، هاوکات پڕکردنەوەی ئەو بۆشاییەی کە بانکەکانی عێراق لە هەرێمی کوردستان دروستیان کردووە.

باکگراوند: بانکی نیشتمانی عێراق مانگی نۆی 2023 دامەزرا و مانگی 12ی 2023 مۆڵەتی بانکی ناوەندی عێراقی پێدرا، بەهۆی تەواونەبوونی چەند ڕێکارێک تاوەکو ئێستا کارا نەکراوە.