مامۆستایەکی خانەنشینی زانکۆ دوای چەند ڕۆژێک لە مردنی تەرمی لە ماڵەکەی دۆزرایەوە

ئاڤا نیوز

دوای چەند ڕۆژێک لە مردنی تەرمی مامۆستایەکی خانەنشینی زانکۆ لە ماڵەکەی خۆی لە شاری هەولێر دۆزرایەوە.

چیرۆکی سەرەکی: لە گەڕەکی 99ـی زانکۆی شاری هەولێر مامۆستایەکی خانەنشینی زانکۆ لە ماڵەکەی خۆی مردووە، بەڵام تا ئەو کاتەی تەرمەکەی بۆنی نەهاتووە کەس بە مردنەکەی نەزانیوە.

لێدوانی فەرمی: سامان عەبدوڵڵا، بەڕێوەبەری ڕاگەیاندنی زانکۆی سەلاحەددین بە ئاڤای گوت: گەزەنگ کامل مەجید، مامۆستای خانەنشینی کۆلێژی زانست بەشی کیمیا لە ماڵەکەی خۆی کۆچی دواییکردووە.

زانیاریی پەیامنێر: عوبێد هەرکی، پەیامنێری ئاڤا گوتی تا ئەو کاتەی تەرمەکەی بۆنی نەهاتووە کەس هەستی بە مردنی ئەو مامۆستایە نەکردووە، ئەمڕۆش تەرمەکەی ڕەوانەی پزیشکی دادی کراوە.

زانیاریی زیاتر: گەزەنگ کامل مەجید، لە دایکبووی 1954، بڕوانامەی ماستەری هەبووە، مامۆستا بووە لە بەشی کیمیای کۆلێژی زانستی زانکۆی سەلاحەددین، سێ ساڵ لەمەوبەر هاوسەرەکەی کۆچی دوایی کردووە و منداڵیان نەبووە، مامۆستا گەزەنگ لە دوای مردنی هاوسەرەکەی، بەتەنیا ژیاوە.