لەسەر سکاڵای هاووڵاتییەک سەرۆکی شارەوانیی شێلادزێ دەستگیر کرا

ئاڤا نیوز

 

لە قەزای ئامێدی، هێزە ئەمنییەکان سەربەست حوسێن، سەرۆکی شارەوانیی ناحیەی شێلادزێیان، لەسەر سکاڵای موختاری گوندێک دەستگیرکرد. دوای پێنج ڕۆژ لە دەستبەسەرکردنی، ناوبراو بە کەفالەت ئازادکراوە و کێشەکەش پەیوەندی بە زەویوزار و تۆمەتی خراپ بەکارهێنانی دەسەڵاتەوە هەیە.

چیرۆکی سەرەکی: محەممەد تۆفیق، موختاری گوندی بێدەیی لە ناحیەی شێلادزێ، کە سکاڵاکاری سەرەکیی کەیسەکەیە، چیرۆکەکەی دەگێڕێتەوە و دەڵێت، ئەو خاوەنی نزیکەی 10 پارچە زەوییە، بەڵام هەر کاتێک ویستبێتی کاریان تێدا بکات، سەرۆکی شارەوانی ڕێگری لێکردووە. بە گوتەی موختارەکە، زەوییەکەی کرابوو بە شوێنی ڕاگرتنی ئۆتۆمبێلەکانی شارەوانی.

موختارەکە ئاشکرای کردووە کە سەرۆکی شارەوانی پێی وتووە " دەزانم زەوییەکان هی خۆتە، بەڵام دەبێت بەپێی یاسا بەشێکیان بدەیتە شارەوانی، ئەگینا ڕێگەت پێنادەم هیچ ئیشیان لەسەر بکەی." دواتر تۆمارێکی دەنگیی سەرۆکی شارەوانی بەدەست گەیشتووە کە تێیدا هەمان داواکاری دووبارە دەکاتەوە.

زانیاریی زیاتر: ئەم تۆمارە دەنگییە وەک بەڵگە پێشکەشی دادگا کراوە و دوای حەوت ڕۆژ، دادگا بڕیاری دەستگیرکردنی سەربەست حوسێن دەرکردووە و مافی خاوەندارێتی بۆ موختارەکە گەڕاندۆتەوە.

قوڵتر: بەڵام ئەم کەیسە، دەرگای لەسەر گومانی گەورەتر کردۆتەوە. بەپێی زانیارییەکان، لە میانی لێکۆڵینەوەکاندا دەرکەوتووە کە گروپێکی 10 کەسی لەگەڵ سەرۆکی شارەوانیدا کاریان کردووە و بە هەمان شێوە کێشەیان بۆ هاووڵاتییانی دیکە لەسەر زەویوزار دروستکردووە.

بۆچوونی لایەنی بەرامبەر: زەید تەها، پەیامنێری ئاڤا چەند جارێک پەیوەندی کرد بۆ سەربەست حوسێن، سەرۆکی شارەوانیی شیلادزێ بەڵام ناوبراو ئامادەنەبوو وەڵامی پەیوەندییەکە بداتەوە و قسە لەسەر بابەتەکە بکات.