سوودانی: بەهۆی "ڕێگریی سیاسییەوە" نەتوانراوە گۆڕانکاریی وەزاریی بکرێت

ئاڤا نیوز

سەرۆکوەزیرانی عێراق ڕایدەگەیێنێت، ئەو گۆڕانکارییە وەزارییەی لە چوارچێوەی بەرنامەی حکومەتدا بەڵێنی دابوو، بەهۆی "ڕێگریی سیاسییەوە" نەتوانراوە بکرێت، هاوکات لەسەر دۆسیەکانی گەندەڵی دارایی و کارگێڕی چوار وەزیر ڕەوانەی دادگا کراون.

چیرۆکی سەرەکی: شەممە 9ـی ئاب، لە بەغدا محەممەد شیاع سوودانی، سەرۆکوەزیرانی عێراق سەرپەرشتی کۆنفرانسی هەڵسەنگاندنی ئەدای حکومەتی کرد.

لێدوانی فەرمی: سەرۆکوەزیرانی عێراق لە میانی کۆنفرانسەکەدا گوتارێکی پێشکەش کرد و لە بەشێکی گوتارەکەی ئاماژە بە بەربەستەکان کرد یەکێک لەوانە وەک خۆی گوتی: "ئەنجامەکانی هەڵسەنگاندن دەریانخست کە شەش وەزیر هەن کە هەڵسەنگاندنەکە دەیانگرێتەوە و پێویستییان بە گۆڕانکاریی وەزاری هەیە. حکومەتی ئێمە حکومەتێکی هاوپەیمانییە و لە چەندین هێزی سیاسی پێکهاتووە، بۆ ئەوەی بچینە پەرلەمان بۆ ئەنجامدانی ئەم گۆڕانکارییە، دەبێت ئەم پرسە لەگەڵ ئەو کوتلانەدا باس بکەین کە حکومەتیان پێکهێناوە. بەداخەوە، زۆربەی هێزە سیاسییەکان ڕێگرییان لە پرۆسەی ئەنجامدانی گۆڕانکاریی وەزاری کرد. هەندێک لە هێزە سیاسییەکان جێگرەوەیان پێشکەش کرد کە ئاستیان زۆر کەمتر بوو لەوانەی هەڵسەنگاندنیان بۆ کرابوو".

ژمارەکان وادەڵێن: شەش لە وەزیرەکان حکومەت سەرۆکوەزیران ئامارەکانی هەڵسەنگاندنەکەی خستەڕوو، کە تیایدا (1135) پرۆسەی هەڵسەنگاندن بۆ بەڕێوەبەرە گشتییەکان ئەنجامدراوە و بەهۆیەوە 41 بەڕێوەبەری گشتی لەسەرکار لادراون کۆتایی بە ڕاسپاردنی 89ی دیکە هێنراوە کە بە وەکالەت کاریان دەکرد. 

لەلایەکی دیکەوە: سوودانی ئاماژەی بەوەشدا، بڵاوبوونەوەی گەندەڵیی دارایی و کارگێڕی نەبوونە هۆی ئەوەی چاوەڕێی ڕێکارەکانی هەڵسەنگاندن بکرێت، بەڵکو بە ڕێکاری دەستبەجێ مامەڵەیان لەگەڵ دەکرا. بەڵگەکەش لەسەر ئەمە چوار وەزیر ڕەوانەی دادگا کران.

لەهەمان کاتدا: ئاماژەی بەوە کرد کە بۆ یەکەمجار لەدوای ساڵی 2003، لەسەر بنەمای ئەنجامی هەڵسەنگاندنەکان، پەرلەمانی عێراق ژمارەیەک بریکاری وەزیر و ڕاوێژکاری بە هەمیشەیی دامەزراندووە، کە ئەمەی بە "پێشهاتێکی مێژوویی" ناوبرد.