لە عێراق پڕۆسەی دەنگدانی ئەزموونی دەکرێت

ئاڤا نیوز


وەکو ئامادەکارییەک بۆ پڕۆسەی دەنگدانی گشتیی، هەڵبژاردنی ئەزموونی لە عێراق بەڕێوەچوو، هاوکار کۆمیسیۆن هەموو ئامادەکارییەکی پێویستی تەواو کردووە.

چیرۆکی سەرەکی: بڕیارە ڕۆژی 11-11-2025، هەڵبژاردنی پەرلەمانی عێراق بەڕێوەبچێت، بۆ ئەم مەبەستە کۆمیسیۆن بەپێی خشتەی کاری خۆی ئامادەکاری بۆ ئەم پرۆسەیە دەکات، لەو چوارچێوەیەشدا ئەمڕۆ کۆمیسیۆن دەنگدانی ئەزموونی ئەنجام دا.

 

لێدوانی فەرمی: مەروان محەممەد، بەرپرسی ئۆفیسی هەولێری کۆمیسیۆن بە ئاڤای گوت: ئەمڕۆ لە دەنگدانی تایبەت هەموو ئامێرەکان و کامێرەکان تاقی دەکرێنەوە، هەموو ڕێکارەکانی هەڵبژاردنیش جێبەجێ دەکرێن، بۆ ئەم مەبەستەش لە هەولێر 53 وێستگە لە هەرسێ بنکەی تۆماری دەنگدەران کراونەتەوە، وێستگەیەک لەناو ئۆفیسی هەولێری کۆمیسیۆن و دوو وێستگەش بۆ دەنگدانی تایبەت لە هەردوو وەزارەتی پێشمەرگە و ناوخۆ کراونەتەوە.

 

لەلایەکی دیکەوە: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤای گوت، لە چوارچێوەی بەردەوامی ئامادەکارییەکانیش بۆ هەڵبژاردن، تاقیکردنەوەی هەڵبژاردن بەشێوەی ئەزموونی لە سەرجەم پارێزگاکانی عێراق و هەرێمی کوردستان دەکرێت، هەزار و 79 بنکەی دەنگدان بۆ ئەم پرۆسەیە کراونەتەوە. 

 

گۆشەیەکی دیکەی دیمەنەکە: دوێنێ شەممە 9/8/2025، کۆمیسیۆنی باڵای سەربەخۆی هەڵبژاردنەکانی عێراق، پرۆسەی تیروپشکی بۆ پێدانی ژمارە بە لیستی حیزب و هاوپەیمانییەتییەکان و کاندیدە سەربەخۆکان ئەنجامدا.

 

ئەوەی پێویستە بیزانیت: بۆ هەڵبژاردنی پەرلەمانی عێراق 31 هاوپەیمانی، 38 حیزب، 76 لیستی کاندیدی تاکەکەسی بە زیاتر لە حەوت هەزار کاندیدەوە، کێبڕکێ لەسەر 329 کورسییەکەی پەرلەمان دەکەن.