77 کەس بەهۆی ئاگرەکەی تورکیا بریندار بوون

ئاڤا نیوز

دووبارە ئاگرێکی گەورە دارستانەکانی پارێزگای چەنەککالێی لە تورکیا گرتەوە و بەهۆیەوە 77 کەس گەیێندرانە نەخۆشخانە. هەروەها چەند گوندێک چۆڵکران و 2090 هاووڵاتی بۆ ناوچەی سەلامەت گوازرانەوە.

وێنە گەورەکە: لەگەڵ بەرزبوونەوەی پلەکانی گەرما و توندیی ڕەشەبا لە ناوچەکە، لە ماوەی کەمتر لە هەفتەیەکدا بۆ دووەم جار ئاگرێکی بەهێز لە دارستانەکانی چەنەککالێ لە تورکیا کەوتەوە. ئەمجارەیان ئاگرەکە زۆر بەخێرایی تەشەنەی کرد و زیانی بە ماڵی هاووڵاتییانیش گەیاند.

ڕاگەیێنراوی فەرمی: ئیبراهیم یوماکڵێ، وەزیری کشتوکاڵ و دارستانی تورکیا، ڕایگەیاند: "لە کۆی 55 ئاگرکەوتنەوە، ئاگرەکانی ناوچەکانی بۆڵو، ئایڤاجک، مەراش، موغڵا و هاتای کۆنترۆڵ کراون، بەڵام تاوەکوو ئێستا هەوڵەکان بۆ کۆنترۆڵکردنی ئاگر لە سەنتەری چەنەککالێ، ئێدیرنە و مانیسا بەردەوامە."

لەپاڵ ئەوەشدا: یوماکڵێ دەڵێت: "هەفتەیەکی زۆر مەترسیدارمان تێپەڕاند، بەداخەوە هێشتا مەترسییەکە کۆتایی نەهاتووە."

لەلایەکی دیکەوە: حکومەتی تورکیا داوا لە هاووڵاتییان دەکات کە لە ناوچەکانی دەرەوەی شار، ئاگر نەکەنەوە و جگەرەی داگیرساو فڕێ نەدەنە سەر زەوی، چونکە ئەمانە دەکرێت ببنە هۆکاری سەرەکیی ئاگرکەوتنەوە.

زیانە سەرەکییەکان: بەهۆی ئاگرەکەوە ژمارەیەکی زۆر ڤێلا و ئۆتۆمبێلی هاووڵاتییان سووتان. 77 کەس بەهۆی کاریگەریی دووکەڵی ئاگرەکەوە گەیێنرانە نەخۆشخانە، هاوکات چەند گوندێک چۆڵکران و 2090 هاووڵاتی کە ژیانیان لە مەترسیدا بوو، بۆ شوێنی ئارام گوازرانەوە.