ڕاوێژکارێکی مالیکی وەڵامی سوودانی دەداتەوە: هەوڵەکانت بۆ گۆڕینی وەزیرەکان بۆ بانگەشەی هەڵبژاردنە

ئاڤا نیوز

 

دوای ئەوەی محەممەد شیاع سوودانی، سەرۆکوەزیرانی عێراق، هێزە سیاسییەکانی بە ڕێگریکردن لە ئەنجامدانی گۆڕانکاری لە شەش وەزارەت و ڕەوانەکردنی چوار وەزیر بۆ دادگا تۆمەتبار کرد، هاوپەیمانیی دەوڵەتی یاسا ئەو لێدوانانە ڕەت دەکاتەوە و بە بانگەشەی هەڵبژاردن وەسفی دەکات.

 

چیرۆکی سەرەکی: سوودانی لە وتارێکیدا لەمیانی یەکەمین کۆنفرانسی هەڵسەنگاندنی کارەکانی حکومەتدا ئاشکرای کرد، ناوی شەش وەزارەتمان پێشکەش کرد کە پێویستیان بە گۆڕانکاریی وەزاری هەبوو، بەڵام زۆربەی هێزە سیاسییەکان دژی ئەم گۆڕانکارییە وەستانەوە، بگرە کەسانێکیان کاندید کرد بۆ جێگرەوەیان ئاستی کارامەیی و توانایان زۆر لەو وەزیرانە کەمتر بوو، ئەمەش بۆ ڕێگریکردن لەو گۆڕانکارییە.

 

سوودانی ئاماژەی بەوەکرد، چوار وەزیری لە حکومەتەکەی بەتۆمەتی کەمتەرخەمی و تێوەگلان لە گەندەڵیدا ڕەوانەی دادگا کردووە، بێ ئەوەی ناوی هیچ کام لەو وەزیرانە بهێنێت.

 

بۆچوونی لایەنی بەرامبەر: عەباس موسەوی، ڕاوێژکاری مالیکی، ڕایگەیاند، ڕاگەیاندنی ئەم بابەتە لەلایەن سودانییەوە بۆ بانگەشەی هەڵبژاردنە و وتیشی، "داوامان لێکرد لێپرسینەوە لە کەسە نزیکەکانی خۆشمان بکات، بەڵام ئەو کارەی نەکرد."

 

زانیاریی بەدەستهاتوو: بەپێی بەشێک لە میدیاکانی عێراق، ئەو چوار وەزیرە دووانیان شیعەن و دووانیشیان سوننەن، یەکێکیان وەزارەتێکی ئەمنی و دووانیشیان خزمەتگوزارین.