ڕێککەوتنە نەوتییەکەی نێوان عێراق و سووریا ئاستەنگی بۆ دروست دەبێت

ئاڤا نیوز

هەردوو حکومەتی عێراق و سووریا ڕێککەوتن کە هەوڵەکان بۆ کاراکردنەوەی هێڵی نەوتی بانیاس لەنێوان هەردوو وڵات دەستپێبکەنەوە، ناوەندێکی ئابووریش دەڵێت، پڕۆژەکە پێویستی بە نزیکەی نیو ملیار دۆلار هەیە و بەغدا و دیمەشق توانای پارەدارکردنی پڕۆژەکەیان نییە.

وێنە گەورەکە: دوێنێ لە بەغدا حەیان عەبدولغەنی، وەزیری نەوتی عێراق و محەممەد بەشیر، وەزیری وزەی سووریا کۆبوونەوە و باسیان لە هەناردەی نەوت لەڕێگەی هێڵی بانیاسی سووریا و تەرابلوسی لوبنان کرد.

ڕاگەیێنراوی فەرمی: وەزارەتی نەوتی عێراق دەڵێت، هەردوولا ڕێککەوتوون لەسەر دروستکردنی لیژنەیەک بۆ تاوتوێکردنی هێڵی بۆرییەکە و ئەگەری هەناردەی نەوت لەم ڕێگەیەوە، پێشنیازیشکراوە لایەنێکی نێودەوڵەتی لەگەڵ هەردوو وەزارەت بەشدار بێت لە دووبارە کاراکردنەوەی هێڵەکە و خەرجی نۆژەنکردنەوەی.

وەزیری نەوتی عێراق لە کۆبوونەوەکەدا ئاماژەی بەوەکرد، بەغدا کار بۆ زیادکردنی دەروازەکانی هەناردەی نەوت دەکات و بەگرنگی دەزانن هێڵی گواستنەوەی نەوتی نێوان عێراق و سووریا کارابکرێتەوە.

بۆچی گرنگە: لەپاڵ ئاوەکانی کەنداو و بەندەری جەیهانی تورکیا، ئێستا حکومەتی عێراق دەیەوێت هێڵی بۆری عێراق-ئوردن و عێراق-سووریا بخاتەکار، ئەوەش بە ئامانجی پاراستنی ئاسایشی وزە و دارایی وڵاتەکە لەکاتی سەرهەڵدانی قەیران و کێشە هەرێمییەکاندا، بەتایبەتیش هێڵی ئوردن کە چاوەڕێ دەکرێت توانای هەناردەی ڕۆژانەی بگاتە سەرووی دوو ملیۆن بەرمیل.

گۆشەیەکی دیکەی دیمەنەکە: پەیوەست بە هێڵی عێراق-سووریاش، ڕوانگەی ئیکۆ عێراق کە تایبەتمەندە بە دۆخی ئابووریی دەڵێت، نۆژەنکردنەوەی هێڵەکە زیاتر لە 400 ملیۆن دۆلاری پێویستە و بەغدا و دیمەشق ئەو پارەیەیان نییە بۆ خەرجکردنی، بۆیەش باشتر وایە وڵاتی سێیەم کە خاوەن بودجە و ئەزموون بێت لەم بوارەدا، لە دروستکردنەوەی هێڵەکەدا بەشداربێت.

ئەوەی پێویستە بیزانیت: ئەوەش لەکاتێکدایە، لە ساڵی 2023ەوە هەناردەی نەوت لەڕێگەی بەندەری جەیهانی تورکیاوە ڕاگیراوە و حکومەتی تورکیاش بڕیاریداوە لە ساڵی 2026ەوە بە ڕێککەوتنێک بە مەرجی نوێوە، ئامادەیە نەوتی عێراق هەناردەی بازارەکانی جیهان بکات.