حیزبوڵڵای عێراق بۆ سوودانی: دەستبەرداری چەکی بەرگری نابین

ئاڤا نیوز

لە وەڵامی لێدوانە یەک لەدوای یەکەکانی سەرۆکوەزیرانی عێراق، سەبارەت بە دۆسیەی کۆنترۆڵکردنی چەک، کەتیبەکانی حیزبوڵڵای عێراق جەختی لەسەر دەستگرتن بە چەکی "مقاوەمە" کردەوە و داوای چەکی پێشکەوتووش دەکات.

چیرۆکی سەرەکی:  چەند ڕۆژێک لەمەوبەر سوودانی لەسەر پرسی کۆنترۆڵکردنی چەک بەدەستی دەوڵەتەوە بەڵێنیدا کە سازش لەو پرسە نەکات، هاوکات بڕیاری دوورخستنەوەی هەردوو  فەرماندەی لیوای 45 و 46 ـی حەشدی شەعبی،  کە سەر بە میلیشیای کەتیبەکانی حیزبوڵڵای عێراقن دەرکرد، ئەمەش بە یەکەم بڕیار لەو  جۆرە دادەنرێت. 

ڕاگەیێنراوی فەرمی: ئەبو حوسێن حەمیداوی، ئەمینداری گشتیی کەتائیبی حیزبوڵڵا، لە بەیاننامەیەکدا ڕایگەیاند: بەرگریکردن لە داگیرکەران و ڕێگریکردن لە دەستدرێژیکاران مافێکی ڕەوایە کە یاسا و شەریعەت ڕێگەیان پێداوە و چەکی گەلانیش دەبێت بۆ بەرگریکردن لە پیرۆزییەکان بمێنێتەوە.

زانیاریی زیاتر: حەمیداوی، داوای پڕچەککردنی  جبەخانەی " مقاوەمە" بە چەکی پێشکەوتوو دەکات بۆ ڕووبەڕووبوونەوەی هەر هەڕەشەیەک کە لەسەر وڵات و هاووڵاتییان ببێتەوە.

ئەمەش بزانە: ئەمینداری گشتیی کەتائیبی حیزبوڵڵا، لە بەیاننامەکەیدا ئاماژەی بەوەکرد، "بەرەی مقاوەمە" هەمیشە ئامادەی قوربانییە و دەستیش بە چەکی بەرگرییەوە دەگرێت و ڕادەستی ناکات.