لە كابینەی نۆیەمدا 564 پرۆژەی وەبەرهێنان جێبەجێكراون

ئاڤا نیوز

لە ماوەی کابینەی نۆیەمدا، 564 پرۆژەی وەبەرهێنان لە سەرانسەری هەرێمی کوردستان، بە بەهای زیاتر لە 24 ملیار دۆلار جێبەجێ کراون و سەرجەم بوارەکانی گرتووەتەوە.

وێنە گەورەکە: کابینەی نۆیەمی حکومەتی هەرێمی کوردستان، قۆناغێکی گرنگی لە گەشەپێدانی وەبەرهێنانی ناوخۆیی لە هەموو کەرتەکاندا بڕیوە و بەهای 24 ملیار و 53 ملیۆن دۆلار لەو سێکتەرە خەرج کراوە و پرۆسەکەش بەردەوامە.

بڵاوکراوەی فەرمی: ماڵپەڕی فەرمی حکومەتی هەرێمی کوردستان بڵاویکردووەتەوە، پرۆژەکان سەرجەم بوارەکانی گرتووەتەوە و زۆرترین پارەی خەرجکراویش لە وەبەرهێنانی پیشەسازی، گەشتیاری، کشتوکاڵ و بازرگانی بووە.

ژمارەکان وا دەڵێن: لە بواری پیشەسازیدا: 142 پرۆژە بە بەهای 3 ملیار و 649 ملیۆن دینار جێبەجێ کراون.

لە کەرتی بازرگانیدا 142 پرۆژە بە گوژمەی ملیارێک و 194 ملیۆن دۆلار جێبەجێ کراون.

لەڕووی گەشتیارییەوە 78 پرۆژە بە گوژمەی 7 ملیار و 559 ملیۆن دۆلار.

لە کەرتی نیشتەجێبوونیش 60 پرۆژە بە گوژمەی 4 ملیار و 868 ملیۆن دۆلار ئەنجام دراون.

زانیاریی زیاتر: پرۆژەی سێکتەرەکانی دیکەی وەبەرهێنان بەمشێوەیە جێبەجێ کراون: فێرکردن: 49 پرۆژە بە بەهای 417 ملیۆن دۆلار، تەندروستی: 34 پرۆژە، بە بەهای 366 ملیۆن دۆلار، کشتوکاڵ: 21 پرۆژە، بە بەهای 561 ملیۆن دۆلار، وەرزشی: 14 پرۆژە بە گوژمەی 84 ملیۆن دۆلار، هاوبەش و بیانی: 11 پرۆژە، بە گوژمەی 5 ملیار و 154 ملیۆن دۆلار، خزمەتگوزاری: 8 پرۆژە بە گوژمەی 100 ملیۆن دۆلار، هونەری: 3 پرۆژە بە گوژمەی 76 ملیۆن دۆلار، بانکەکان: 2 پرۆژە بە گوژمەی 19 ملیۆن دۆلار.