ئەڵمانیا بڕیاری دەرکردنی ئەمیرێکی پێشووی داعش دەدات

ئاڤا نیوز

دادگایەکی ئەڵمانیا بڕیاری کۆتایی بۆ دەرکردنی ئەبو وەلا، ئەمیری پێشووی ڕێکخراوی داعش لەو وڵاتە دەرکرد، بەڵام هێشتا دیار نییە ئایا بە کردەوە دیپۆرت دەکرێتەوە بۆ عێراق یان نا.

وێنە گەورەکە: دوای کۆنترۆڵکردنەوەی ژمارەیەک لە شارەکانی عێراق و سووریا و کوژرانی سەدان چەکدار و سەرکردەی ڕێکخراوی داعش، بەشێکیان وڵاتەکەیان جێهشت و بەرەو ئەوروپا کۆچیان کرد. تاوەکو ئێستا بەشێکی زۆریان لەو وڵاتانە ڕووبەڕووی دادگا کراونەتەوە.

لێدوانی فەرمی: گوتەبێژێک بەناوی دادگای کارگێڕی لە شاری دوسلدۆرفی ئەڵمانیا ڕایگەیاند، بڕیاری دەرکردنەکە یاساییە و تانەی لێ نەگیراوە. پێشتر ئەحمەد عەبدولعەزیز عەبدوڵڵا، ناسراو بە "ئەبو وەلا عێراقی" کە بە ڕەچەڵەک عێراقییە، سزای 10 ساڵ و نیو زیندانیی بەسەردا سەپێنراوە، بە بیانووی بوونی حەوت منداڵی لە ئەڵمانیا سکاڵای دژی بڕیارەکە تۆمار کردبوو، بەڵام دادگا سکاڵاکەی ڕەتکردەوە و جەختی کردەوە کە "بەرژەوەندیی ئاسایشی نیشتمانی" لە پێشینەترە.

زانیاریی زیاتر: بە گوتەی گوتەبێژەکە، هیچ نیشانەیەک نییە بۆ ئەوەی ئەبو وەلا وازی لە بیری تووندڕەوی هێنابێت. لەگەڵ ئەوەشدا، بڕیاری دەرکردن تەنیا فەرمانێکی کارگێڕییە بۆ بەجێهێشتنی وڵات، بەڵام دیپۆرتکردنەوەی کردەیی پێویستی بە ڕێکاری دیکە هەیە.

لەهەمان کاتدا: وتەبێژی دادگای کارگێڕی دوسلدۆرف وتی: "دادگا هێشتا چاوەڕێی بڕیاری کۆتایی لەسەر دۆسیەی پەنابەرییەکەی دەکەن، چونکە "ئەگەری سزای لەسێدارەدان لە عێراق" هۆکارێکی سەرەکییە کە ڕێگرە لە دیپۆرتکردنەوەی.