کۆمیسیۆن ڕاکان جبووری لە کێبڕکێی هەڵبژاردن دوور دەخاتەوە

ئاڤا نیوز

کۆمیسیۆنی باڵای هەڵبژاردنەکان هەریەک لە ڕاکان جبووری، پارێزگاری پێشووی کەرکوک و حەیدەر مەلا، سەرکردە لە هاوپەیمانیی عەزمی لە بەشداریکردن لە هەڵبژاردنی داهاتوودا دوورخستووەتەوە.

وێنە گەورەکە: بڕیارە لە 2025-11-11، هەڵبژاردنی خولی شەشەمی ئەنجوومەنی نوێنەرانی عێراق بکرێت، لەچوارچێوەی ڕێکارەکانی بەر لە هەڵبژاردنیش، کۆمیسیۆن تاوەکو ئێستا ژمارەیەک کاندیدی بەهۆکاری جیاجیا لە کێبڕکێکە دوورخستوونەتەوە.

زانیاریی بەدەستهاتوو: بەگوێرەی چەند سەرچاوەکی ئاگادار کە قسەیان بۆ میدیا عێراقییەکان کردووە ئاماژە بۆ ئەوە دەکەن، کۆمیسیۆنی هەڵبژاردنەکان بڕیاریداوە بە دوورخستنەوەی ڕاکان جبووری، سەرۆکی هاوپەیمانیی عەرەبی لە کەرکووک و پارێزگاری پێشووی شارەکە، لەگەڵ حەیدەر مەلا، سەرکردە لە هاوپەیمانیی عەزم، لە کێبڕکێی هەڵبژاردن.

لێدوانی فەرمی: عەلی عەباس، گوتەبێژی لقی کەرکووکی کۆمیسیۆنی باڵای هەڵبژاردنەکان بە ئاڤا میدیای ڕاگەیاند، تاوەکو ئێستا بڕیاری دوورخستنەوەی ڕاکان جبووری لەلایەن ئەنجوومەنی کۆمیسیارانەوە دەرنەچووە، بەڵام ڕەنگە تا کۆتایی دەوامی ئەمڕۆ بڕیارەکانی ئەنجوومەنی کۆمیسیارانمان بەدەست بگات.

ئەوەی پێویستە بیزانیت: لە ماوەی ڕۆژانی ڕابردوودا، کۆمیسیۆنی باڵای هەڵبژاردنەکان زیاتر لە 500 کاندیدی بە هۆکاری جیاواز لە کێبڕکێی هەڵبژاردن دوورخستوونەتەوە.

هۆکارە زانراوەکان: هۆکاری دوورخستنەوەکان بریتیی بوونە لە: نەبوونی شایستەیی و ناوبانگی باش، بەعسی بوون، بوونی تۆماری تاوانکاری و تۆمەتی گەندەڵیی دارایی و کارگێڕی، هاوکات پێشکەشنەکردنی سەرجەم بەڵگەنامە پێویستەکان بۆ خۆکاندیدکردن، وەک بڕوانامەی خوێندن.