پەرلەمانی عێراق هەفتەیەکی پڕ لە دانیشتن و یاسای گرنگ بەڕێدەکات

ئاڤا نیوز

بڕیارە ئەنجوومەنی نوێنەرانی عێراق لەم هەفتەیەدا سێ دانیشتنی ئاسایی ئەنجام بدات، کە تێیدا کارنامەیەکی چڕوپڕی پڕ لە پرۆژەیاسای گرنگ و جۆراوجۆر تاوتوێ دەکات.

چیرۆکی سەرەکی: دوایین دانیشتنی پەرلەمان لەم وەرزەی یاسادان لە 5ـی ئاب بە کەوتنەوەی گرژی کۆتایی پێهات و ئەمڕۆش سەرۆکایەتیی پەرلەمان کۆبووەوە، لە کۆبوونەوەکە لەسەر میکانیزمێکی نوێ و هاوبەش ڕێککەوتن بۆ دیاریکردن و پەسەندکردنی کارنامەی دانیشتنەکانی داهاتوو.

ڕاگەیێنراوی فەرمی: نووسینگەی پەرلەمانی عێراق، کارنامەی دانیشتنەکانی ڕۆژانی دووشەممە، سێشەممە و چوارشەممەی بڵاوکردەوە، بەگوێرەی کارنامەکە، پەرلەمان دەنگ لەسەر چەندین یاسای پەیوەست بە کەرتی پەروەردە، وزە، قەرەبووکردنەوەی قوربانیان و ڕێککەوتننامەی نێودەوڵەتی دەدات، هاوکات خوێندنەوە بۆ چەندین پرۆژەیاسای دیکەش دەکات.

کارنامەی دانیشتنی ڕۆژی دووشەممە 25ـی ئاب:

لە یەکەم دانیشتنی هەفتەکەدا، پەرلەمان تیشک دەخاتە سەر کەرتی پەروەردە و دەنگدان لەسەر دوو پرۆژەیاسای گرنگ:

٠ دەنگدان لەسەر پرۆژەیاسای هەموارکردنی یەکەمی یاسای وەزارەتی پەروەردە.

٠ دەنگدان لەسەر پرۆژەیاسای هەموارکردنی یەکەمی یاسای بنەماکانی یەکسانکردنی بڕوانامەکان.

٠ خوێندنەوەی یەکەم بۆ پرۆژەیاسای چاودێریکردنی منداڵانی نەخوێندەوار و خوێندنەوەی دووەم بۆ پرۆژەیاسای کۆلێژی فڕۆکەوانیی سوپا دەکرێت.

کارنامەی دانیشتنی ڕۆژی سێشەممە 26ـی ئاب:

دانیشتنی دووەم گرنگییەکی تایبەت بە دۆسیەی قوربانیان و کەرتی وزە دەدات، کە تێیدا بڕیارە:

٠ دەنگ لەسەر پرۆژەیاسای هەموارکردنی دووەمی یاسای دامەزراوەی شەهیدان ئەنجام بدرێت.

٠ دەنگ لەسەر پرۆژەیاسای ڕێکخستنی وزەی نوێبووەوە بدرێت.

لە بەشێکی دیکەی دانیشتنەکەدا، خوێندنەوەی یەکەم بۆ پرۆژەیاسای قەرەبووکردنەوەی زیانلێکەوتووانی ئۆپەراسیۆنە سەربازییەکان و هەڵەکان دەکرێت، لەگەڵ خوێندنەوەی دووەم بۆ پرۆژەیاسای هەموارکردنی یاسای دەستەی گشتیی چاودێریکردنی هاوردەکان.

کارنامەی دانیشتنی ڕۆژی چوارشەممە 27ـی ئاب:

لە کۆتا دانیشتنی هەفتەکەدا، چەندین پرۆژەیاسای ستراتیژی دەخرێنە دەنگدانەوە، دیارترینیان:

٠ دەنگدان لەسەر پرۆژەیاسای تەندروستیی دەروونی.

٠ دەنگدان لەسەر پرۆژەیاسای پەسەندکردنی ڕێککەوتننامەی هاندان و پاراستنی وەبەرهێنانی هاوبەش لەنێوان حکومەتی عێراق و شانشینی عەرەبی سعودیە.

٠ دەنگدان لەسەر پرۆژەیاسای قەرەبووکردنەوەی ئەو کەسانەی لەسەردەمی ڕژێمی پێشوودا زیانی جەستەییان بەرکەوتووە.

هەروەها خوێندنەوەی یەکەم بۆ پرۆژەیاسای بەڕێوەبردنی پاشماوەی شارەوانییەکان و پرۆژەیاسای پەسەندکردنی ڕێککەوتننامەی نەتەوە یەکگرتووەکان سەبارەت بە ناوبژیوانی دەکرێت.

ئەوەی لەبارەیەوە دەگوترێت: شاخەوان عەبدوڵڵا، جێگری سەرۆکی پەرلەمانی عێراق بە ئاڤامیدیای گوت: دووشەممەی داهاتوو پەرلەمان کۆدەبێتەوە و ئەو پرۆژە یاسایەی خەڵک لێی دەترسا ناخرێتە بەرنامەی کاری کۆبوونەوەکە.

بەرنامەی کاری هەر سێ ڕۆژ بە زمانی عەرەبی: