کەشتییەکی وزەی تورکیا بۆ چارەسەرکردنی قەیرانی کارەبا گەیشتە عێراق

ئاڤا نیوز

کۆمپانیای گشتیی بەندەرەکانی عێراق، گەیشتنی کەشتییەکی تورکیی تایبەت بە بەرهەمهێنانی وزەی کارەبای بۆ بەندەری ئوم قەسر لە پارێزگای بەسرە ڕاگەیاند.

چیرۆکی سەرەکی: بڕیارە دوو وێستگەی کارەبای سەرئاو لە بەندەرەکانی خۆر زوبێر و ئوم قەسر لە بەسرە جێگیر بکرێن و چاوەڕوان دەکرێت لە ماوەی مانگێکدا دەست بەکارەکانیان بکەن، کۆمپانیای کار پاوەر شیپی تورکیش کە کاری بەڕێوەبردنی وێستگە کارەباییە سەرئاوییەکان دەکات، دەڵێت "ڕێککەوتنێکمان بۆ دابینکردنی نزیکەی 590 مێگاوات کارەبا بۆ عێراق واژۆ کردووە ".

لێدوانی فەرمی: فەرحان فەرتووسی، بەڕێوەبەری گشتیی کۆمپانیای بەندەرەکانی عێراق ڕایگەیاند: یەکەم کەشتیی تورکیی تایبەت بە بەرهەمهێنانی وزەی کارەبا ئەمڕۆ پێنجشەممە 21-8-2025 گەیشتە بەندەری ئوم قەسری باشوور لە پارێزگای بەسرە.

فەرتووسی ئاماژەی بەوەشدا، ئەم هەنگاوە بەپێی ئەو گرێبەستە دێت کە لەنێوان وەزارەتی کارەبای عێراق و کۆمپانیای کار پاوەر شیپی تورکیدا واژۆ کراوە، بە ئامانجی پشتگیریکردنی تۆڕی نیشتمانیی کارەبا بە بڕی 315 مێگاوات.

لەلایەکی دیکەوە: کۆمپانیای کار پاوەر شیپی تورکی لە بەیاننامەکەیدا ڕایگەیاند، گرێبەستە سەرەتاییەکەی کە لەگەڵ وەزارەتی کارەبای عێراق و کۆمپانیای گشتیی بەرهەمهێنانی کارەبادا واژۆ کراوە، بۆ ماوەی حەفتا و یەک ڕۆژە.

ئەوەی پێویستە بیزانیت:  ئەم ڕێککەوتنە دوای ئەوە هاتووە کە ناوچەکانی ناوەڕاست و باشووری عێراق لەم مانگەدا تووشی داڕمانی تۆڕی گشتی کارەبا بوون و بەشێک لە وێستگەکانی بەرهەمهێنانی کارەبا بەتەواوی لەکارکەوتن.