ناکۆکییەکان لەسەر تێپەڕاندنی یاسای حەشدی شەعبی بەردەوامە

ئاڤا نیوز

بەپێی زانیارییەکان، سێ سەرۆکایەتییەکەی عێراق لە کۆبوونەوەی ئەم دواییەیاندا بە درێژی گفتوگۆیان لەسەر پرۆژەیاسای حەشدی شەعبی کردووە و داوایان نەکردووە یاساکە لەم کاتەدا پەسەند بکرێت.

چیرۆکی سەرەکی:  دوای سەرهەڵدانی داعش ساڵی 2014 و داگیرکردنی یەک لەسەر سێی عێراق، بە فەتوای عەلی سیستانی مەرجەعی باڵای شیعەکان هێزێکی سەربازی بۆ پاراستنی عێراق پێکهێنرا و ناوی لێنرا حەشدی شەعبی، ئێستا ئەم هێزە 238 هەزار چەکداری هەیە و ساڵانە لە بودجەی دەوڵەت 3.6 مليار دۆلار دەبات، لەژێر چەتری ئەم دامەزراوەیەش، 70 گرووپی چەکداری جیاوازی شیعی کە بەشێکیان لە لیستی سزاکانی ئەمریکادان لەوانەش نوجەبا، عەسایب و حیزبوڵڵا کۆکراونەتەوە.

لێدوانی فەرمی: ئەسیر شەرع، توێژەری سیاسی، پێشبینی دەکات کە یاسای حەشدی شەعبی لەم خولەی ئێستای پەرلەماندا تێپەڕێنرێت، سەرەڕای ناڕەزایەتیی هێزە سوننی و کوردییەکان و تەنانەت هەندێک لایەنی شیعیش.

شەرع لە لێدوانێکدا بۆ ئاڤا میدیا هۆشداریدا و وتی: "ئەگەر یاساکە پەسەند بکرێت، عێراق ڕووبەڕووی سزای قورس دەبێتەوە."

لەلایەکی دیکەوە:  بەشێک لە لایەنە سیاسییەکانی عێراق، نیگەرانیی خۆیان لە تێپەڕاندنی ئەم یاسایە دەردەبڕن و داوا لە سێ سەرۆکایەتییەکەی عێراق دەکەن لە ئاست بەرپرسیارێتیی مێژوویی خۆیاندا هەڵوێستی جددی وەرگرن و هۆشداریش لە وروژاندنی ئەم بابەتە بۆ مەرامی بانگەشەی هەڵبژاردن دەدەن.

ئەوەی پێویستە بیزانیت: ئەمریکا بە ئاشکرا دژایەتی خۆی بۆ پەسەندکردنی یاسای نوێی حەشدی شەعبی دەربڕیووە و لە پەیوەندییە تەلەفۆنییەکەی 23ـی تەممووزی نێوان محەممەد شیاع سوودانی، سەرۆکوەزیرانی عێراق و مارکۆ ڕۆبیۆ، وەزیری دەرەوەی ئەمریکادا، ڕۆبیۆ ڕایگەیاندووە کە ئەم پڕۆژە یاسایە دەبێتە هۆی بەدامەزراوەییکردنی هەژموونی "ئێران و گرووپە چەکدارە تیرۆریستییەکان، کە ئەمەش سەروەریی عێراق لاواز دەکات."