خەزعەلی: ئەمریکا هەڕەشەی سەپاندنی سزا لە عێراق دەکات

ئاڤا نیوز

 

ئەمینداری گشتیی "عەسائیبی ئەهلی حەق"، ڕەخنەی لە داواکارییە نێودەوڵەتییەکان بۆ هەڵوەشاندنەوەی حەشدی شەعبی دەگرێت و دەڵێت، " ئەمریکا هەڕەشەی سەپاندنی سزای ئابووری لە عێراق کردووە لە ئەگەری تێپەڕاندنی یاسای حەشدی شەعبی لەنێو پەرلەماندا".

 

وێنە گەورەکە: ئەمریکا بە ئاشکرا دژایەتی خۆی بۆ پەسەندکردنی یاسای نوێی حەشدی شەعبی دەربڕیووە و لە پەیوەندییە تەلەفۆنییەکەی 23ـی تەممووزی نێوان محەممەد شیاع سوودانی، سەرۆکوەزیرانی عێراق و مارکۆ ڕۆبیۆ، وەزیری دەرەوەی ئەمریکادا، ڕۆبیۆ ڕایگەیاندووە کە ئەم پڕۆژە یاسایە دەبێتە هۆی بە دامەزراوەییکردنی هەژموونی ئێران و گرووپە چەکدارە تیرۆریستییەکان، کە ئەمەش سەروەریی عێراق لاواز دەکات. 

  

لێدوانی فەرمی: قەیس خەزعەلی، ئەمینداری گشتیی "عەسائیبی ئەهلی حەق"، ڕایگەیاند: ئەوانەی داوای هەڵوەشاندنەوەی حەشدی شەعبی دەکەن، دەیانەوێت پێگەی عێراق لاوازبکەنەوە." دەشڵێت،  "فشارە دەرەکییەکانیش دژی دەرکردنی یاسای حەشدی شەعبی گەیشتوونەتە ئاستێکی زۆر مەترسیدار".

 

زانیاریی زیاتر: ئەمینداری گشتیی عەسائیبی ئەهلی حەق ئاماژەی بەوەکرد، "هەڕەشەی ئەمریکامان پێگەیشتووە بە سەپاندنی سزای ئابووری بەسەر عێراقدا، کە ڕەنگە کەرتی نەوت و بوارەکانی دیکەش بگرێتەوە، لە ئەگەری تێپەڕاندنی یاسای حەشدی شەعبی لەنێو پەرلەماندا".

 

ئەوەی پێویستە بیزانیت:  دوای سەرهەڵدانی داعش ساڵی 2014 و داگیرکردنی یەک لەسەر سێی عێراق، بە فەتوای عەلی سیستانی، مەرجەعی باڵای شیعەکان هێزێکی سەربازی بۆ پاراستنی عێراق پێکهێنرا و ناوی لێنرا حەشدی شەعبی، ئێستا ئەم هێزە 238 هەزار چەکداری هەیە و ساڵانە لە بودجەی دەوڵەت 3.6 مليار دۆلار دەبات، لەژێر چەتری ئەم دامەزراوەیەش، 70 گرووپی چەکداری جیاوازی شیعی کە بەشێکیان لە لیستی سزاکانی ئەمریکادان لەوانەش: نوجەبا، عەسایب و حیزبوڵڵا کۆ کراونەتەوە.