تۆڕێکی بازرگانیکردن بە ماددەی هۆشبەر و لەشفرۆشی دەستگیر دەکرێن

ئاڤا نیوز

فەرماندەیی ئۆپەراسیۆنەکانی بەغدا دەستگیرکردنی تۆڕێکی بازرگانیی بە ماددەی هۆشبەر، لەشفرۆشی و قاچاخچێتییەوە  ئاشکرا کرد و ڕایگەیاند" بەشێکی زۆریان  بیانیین و لە پایتەختدا نیشتەجێن. 

وێنە گەورەکە: بەدەر لە بەکارهێنەرانی؛ چەندین تۆڕی ناوخۆیی و نێودەوڵەتیی تایبەت بە ماددەی هۆشبەر و قاچاخچی کە لە عێراقدا چالاکن، بەپێی نوێترین ڕاپۆرتی نەتەوە یەکگرتووەکان کە لە ڕێگەیەوە هۆشداری دابوو، خەریکە عێراق دەبێتە ناوەندێک بۆ بڵاوبوونەوەی ماددە هۆشبەرەکان لە ناوچەکەدا.

ڕاگەیێنراوی فەرمی: وەلید خەلیفە تەمیمی، فەرماندەی ئۆپەراسیۆنەکانی بەغدا، ڕایگەیاند: لەمیانی هەڵمەت و ڕێکاری چڕ بۆ کۆنترۆڵکردنی دۆخی بیانییەکان و بەرەنگاربوونەوەی تۆڕەکانی تاوانی ڕێکخراو، هەڵمەتی پشکنینی هۆتێل و شوقە و ئەو گەڕەکانە کرا کە بیانییان تێدا نیشتەجێن و لەگەڵ وردبینیکردنی ناسنامەکان و دانانی بازگەی کاتی بۆ دڵنیابوونەوە لە دروستیی بەڵگەنامە فەرمییەکان و ئاشکراکردنی ساختەکانیان دەستی پێکردووە.

زانیاریی زیاتر: تەمیمی دووپاتیشیکردەوە، هێزە ئەمنییەکان چەند تۆڕێکیان دەستگیرکردووە کە کاری نایاساییان ئەنجامداوە، وەک بازرگانیکردن بە ماددەی هۆشبەر، لەشفرۆشی و قاچاخچێتی، کە هەندێکیان پەیوەندییان بە بیانییەکانەوە هەبووە.

ئەمەش بزانە: فەرماندەی ئۆپەراسیۆنەکانی بەغدا، جەختی لەسەر بەردەوامیی هەماهەنگی لەگەڵ وەزارەتی ناوخۆ کردووە بۆ دوورخستنەوەی نیشتەجێبووانی نایاسایی.