بە فڕۆکەی F16 مۆڵگەیەکی داعش لە سەڵاحەددین بۆردومان دەکرێت

ئاڤا نیوز

هێزی ئاسمانی عێراق بە فڕۆکەی جۆری F16 مۆڵگەیەکی پاشماوەی چەکدارانی داعش لە دۆڵی چای لە پارێزگای سەڵاحەددین بۆردومان دەکات و بەهۆیەوە چەند چەکدارێکی ئەو ڕێکخراوە دەکوژرێن.
 

 وێنە گەورەکە: هەرچەندە زیاتر لە حەوت ساڵ بەسەر کۆتاییهاتنی ڕێکخراوی داعش لە عێراق تێدەپەڕێت، بەڵام تاوەکو ئێستا شانە نوستووەکانی ڕێکخراوەکە جار جار هێزە ئەمنییەکان و هاووڵاتییانی مەدەنی بەئامانج دەگرن. 
 
ڕاگەیێنراوی فەرمی: شانەی ڕاگەیاندنی ئەمنیی عێراق بڵاویکردەوە: دوای کۆکردنەوەی زانیاریی هەواڵگری لەسەر مۆڵگەیەکی تیرۆرستانی داعشییان لە دۆڵی چای لەڕۆژهەڵاتی پارێزگای سەڵاحەددین، بەرەبەیانی ئەمڕۆ بە فڕۆکەی جۆری F16  ئەو پێگەیە لەلایەن سوپای عێراقەوە کراوەتە ئامانج.

زانیاریی زیاتر: بەگوێرەی ڕاگەیێنراوەکە، لەئاکامی هێرشەکەدا سەرجەم تیرۆریستانی ناو مۆڵگەکە کوژراون و هەموو ئەو چەک و کەلوپەل و ئامێرانەی پەیوەندیکردن لەناویدا بوون تێکشکێندران. 
 
ئەمەش بزانە: شانەی ڕاگەیاندنی ئەمنیی عێراق ئاماژەی بەوەشکرد، ئەو حەشارگەیەی کراوەتە ئامانج کەوتووەتە ناو کەرتی فەرماندەیی ئۆپەراسیۆنەکانی ڕۆژهەڵاتی سەڵاحەددین و بەشوێنێکی سەختی سەربازی، وەک پەناگەیەک بەکارهێنراوە.