واشنتۆن "لەناکاو" هێزەکانی لە دوو بنکەی عێراق دەکشێنێتەوە

ئاڤا نیوز

ویلایەتە یەکگرتووەکانی ئەمریکا بەشێوەیەکی لەناکاو بڕیاریداوە تەواوی هێزەکانی لە دوو بنکەی عێراق بکشێنێتەوە، پابەندی ئەو خشتە کاتییە نابن کە لە چوارچێوەی ڕێککەوتننامەی ستراتیژیی نێوان هەردوو وڵاتدا دانراوە.

وێنە گەورەکە: مانگی ئەیلوولی ساڵی ڕابردوو عێراق و ئەمریکا لەسەر دانانی خشتەیەک بۆ کشانەوەی هێزەکانی سەر بە هاوپەیمانی نێودەوڵەتیی دژی داعش لە عێراق ڕێککەوتن.

بەگوێرەی ڕێککەوتنەکە هێزەکانی ئەمریکا لە ئەیلوولی 2025 لە هەردوو بنکەی عەین ئەسەد و ڤیکتۆریا لە عێراق دەکشێنەوە، لە ئەیلوولی ساڵی 2026یش لە هەموو عێراق ئەرکەکانیان کۆتایی دێت.

زانیاریی بەدەستهاتوو: سەرچاوەکان، ئەمڕۆ یەکشەممە 2025-8-24، بە کەناڵی سکای نیوز عەرەبییەیان ڕاگەیاند، واشنتن بە شێوەیەکی لەناکاو بڕیاریداوە هەموو سەربازەکانی لە هەردوو بنکەی عەین ئەسەد و ڤیکتۆریا لە عێراق بکشێنێتەوە.

زانیاریی زیاتر: سەرچاوەکان ڕوونیانکردەوە کە هێزە ئەمریکییەکان دەستیان کردووە بە گواستنەوەی ئەندامەکانیان بۆ هەولێر و وڵاتێکی عەرەبیی دراوسێ.

لەهەمان کاتدا: ئاماژەیان بەوەشکردووە، "ئەمریکییەکان هاوتا عێراقییەکانیان ئاگادارکردووەتەوە کە پرۆسەی کشانەوەکە خێراتر دەکەن و پابەندی ئەو خشتە کاتییە نابن کە لە چوارچێوەی ڕێککەوتننامەی ستراتیژیی نێوان هەردوو وڵاتدا دانراوە".

ئەوەی لەبارەیەوە دەگوترێت: پێشتر، سەباح نوعمان، وتەبێژی فەرماندەی گشتیی هێزە چەکدارەکانی عێراق، ڕۆژی دووشەممەی ڕابردوو، جەختی کردبووەوە کە کشانەوەی هێزەکانی هاوپەیمانان لە عێراق یەکێکە لە دەستکەوتەکانی حکومەت و ئاماژەی بەوەدابوو کە ئەمە نیشانەی توانای عێراقە بۆ ڕووبەڕووبوونەوەی تیرۆر.

لەلایەکی دیکەوە: باڵیۆزخانەی ئەمریکا لە ڕاگەیێنراوێکدا ڕایگەیاندبوو، "ئەمە کۆتایی کاری هاوپەیمانیی نێودەوڵەتی نییە بۆ تێکشکاندنی داعش، بەڵکو لەسەر ئاستی جیهان بەردەوام دەبێت لە هەوڵە مەدەنییەکانی بە سەرکردایەتییەکی مەدەنی."

 

هاوکات ڕایگەیاندبوو، "ئەرکی سەربازیی هاوپەیمانان لە عێراق دەگۆڕدرێت بۆ هاوبەشییەکی ئەمنیی دووقۆڵی" و ئاماژەی بەوەشکردبوو کە "وردەکارییەکانی پەیوەست بە پلان و ئۆپەراسیۆنە سەربازییەکانمان، ڕەوانەی وەزارەتی بەرگری دەکرێن."