ئاڤای خەڵک؛ دانیشتووانی 80 ماڵ داوای دروستکردنی ڕێگا بۆ گوندەکەیان دەکەن

ئاڤا نیوز

چەند ساڵێکە دانیشتوانی گوندی جۆنەڵە بەهۆی خراپی ڕێگەی هاتوچۆی گوندەکەیانەوە تووشی ئاستەنگ بوون، داوا دەکەن ئاڤا دەنگیان بگەیەنێت و کێشەیان بۆ چارەسەر بکرێت.

چیرۆکی سەرەکی: گوندەکە دەکەوێتە ناحیەی بجیل و ژمارەی ماڵەکانی نزیک دەبێتەوە لە 80 ماڵ، ڕێگەی هاتوچۆیان زۆر خراپە ئەمەش بووەتە هۆی دروستبوونی ئاستەنگی هاتوچۆ و داوا دەکەن ڕێگەی نوێیان بۆ دروست بکرێت. 

لێدوانە فەرمییەکان: ئەشقی هاونیشتمانییەکی بەتەمەنی گوندەکەیە و بە ئاڤای گوت: خەڵکێکی هەژارین و ئەم هاوینە کێشەی کەمئاویمان هەبوو، تەنانەت بە تانکەریش ئاویان بۆ نەدەهێناین و دەیانگوت ڕێگەی گوندەکەتان خراپە.

موحسین میرانی، بەڕێوەبەری ڕێگاوبانی ئاکرێ لەوبارەیەوە بە ئاڤای ڕاگەیاند: تیمی ئەندازەییمان ڕەوانەی گوندی جۆنەڵە کردووە، پشکنین و دەرخستەمان بۆ کردووە و ڕەوانەی بەڕێوەبەرایەتیی گشتیی ڕێگاوبانی دهۆکمان کردووە، نووسراوی پرۆژەکە ڕەوانەی قایمقامیەت کراوەتەوە، بەڵام بەهۆی قەیرانی دارایی و نەبوونی پارە جێبەجێ نەکراوە.

بۆ ڕێگاوبانی سنووری ئاکرێ و بەردەڕەش نزیکەی 300 دەرخستەمان کردووە، بەپێی ئیمکانیاتی بەردەست کاریان لەسەر دەکرێت.

لەلایەکی دیکەوە: بەشار محەممەد، بەڕێوەبەری ناحیەی بجیل بە ئاڤای گوت: گوندی جۆنەڵە و ژمارەیەک گوندی دیکە پێویستییان بە ڕێگا هەیە و ڕەزامەندیان بۆ وەرگیراوە، بەڵام بودجەی پێویست لەبەردەست نییە، هەرکات پارە هەبوو دەست بە دروستکردنی رێگاکان دەکەین.