قوتابیانی زانکۆی کەرکووک دەتوانن تاقیکردنەوەکان بە کوردی وەڵام بدەنەوە

ئاڤا نیوز

جێگری سەرۆکی پەرلەمانی عێراق بە قوتابییانی کوردی زانکۆی کەرکووک ڕادەگەیەنێت، دەتوانن تاقیکردنەوەکان بە زمانی کوردی وەڵام بدەنەوە.

وێنە گەورەکە: پێشتر وەزارەتی خوێندنی باڵا و توێژینەوەی زانستیی عێراق لە هەنگاوێکی شۆڤێنیدا بە نووسراوی فەرمی بەکارهێنانی زمانی کوردی لە وانەوتنەوە و دانانی پرسیاری تاقیکردنەوەکاندا لە زانکۆ حکومی و تایبەتەکانی پارێزگاکانی کەرکووک، مووسڵ و دیالە قەدەغە کرد، بەبیانووی ئەوەی مەنهەجی خوێندن بە زمانەکانی عەرەبی و ئینگلیزییە؛ پێویستە دانانی پرسیار و وەڵامدانەوەش، تەنها بەو دوو زمانە بێت، ئەو بڕیارەش کاردانەوەی تووندی لێ کەوتەوە و بە "نادەستووری و پێچەوانەی بنەماکانی یەکسانی" وەسف کرا و داوای هەڵوەشاندنەوەی دەستبەجێی کرا. دوای چەند کاتژمێرێک بڕیارەکە هەڵوەشایەوە.

لێدوانی فەرمی: د. شاخەوان عەبدوڵڵا، جێگری سەرۆکی پەرلەمانی عێراق ڕایگەیاند، لەگەڵ سەرۆکی زانکۆی کەرکووک قسەی کردووە و سەرۆکی زانکۆ دڵنیایی داوە لەوەی، ڕاسپاردەی وەزیری خوێندنی باڵا جێبەجێ دەکات و لە تاقیکردنەوەکانی خولی دووەمی وانەکاندا، ئەوانەی بە زمانی کوردی وەڵام دەدەنەوە، هیچ کێشەیەکیان نابێت.