لە میسان تەنیا لە دوو ڕۆژدا زیاتر لە 300 فەرمانی دەستگیرکردن جێبەجێکران

ئاڤا نیوز

وەزیری ناوخۆی عێراق ڕایدەگەیێنێت، لە ماوەی دوو ڕۆژی ڕابردوودا لە پارێزگای میسان زیاتر لە 300 فەرمانی دەستگیرکردن جێبەجێ کراون، ناوبراو داوا لە داواکراوان دەکات کە هەڵاتوون بۆ پارێزگاکانی دیکە، خۆیان ڕادەست بکەن.

چیرۆکی سەرەکی: عەبدولئەمیر شەممەری، وەزیری ناوخۆی عێراق سەردانێکی مەیدانی بۆ میسان ئەنجامدا و لەگەڵ سەرۆک و ئەندامانی ئەنجوومەنی پارێزگاکە کۆبووەوە و تاوتوێی دۆخی ئەمنیی پارێزگاکەیان کرد.

لێدوانی ڕۆژنامەوانی: وەزیری ناوخۆ لە کۆنگرەیەکی ڕۆژنامەوانیدا ڕایگەیاند، ئەنجوومەنی پارێزگای میسان سوورە لەسەر پشتیوانیکردنی گەشەپێدانە ئەمنییەکان لە پارێزگاکەدا، بە شێوەیەک کە "ئاسایشی پارێزگاکە دابین بکات، کۆنترۆڵی ناکۆکییە خێڵەکییەکان بکات، ڕووداوەکان و تاوانەکان کەم بکاتەوە."

لەهەمان کاتدا: شەممەری ئاماژەی بەوەدا، سەردانی سەرۆکی دادگای تێهەڵچوونەوەی میسانی کردووە و چەندین پرسیان تاوتوێ کردووە، لەوانەش جێبەجێکردنی فەرمانەکانی دەستگیرکردن.

وتیشی، "لە ماوەی دوو ڕۆژی ڕابردوودا زیاتر لە 300 فەرمانی دەستگیرکردنمان جێبەجێ کردووە کە هەندێکیان پەیوەندییان بە تاوانەکانی کوشتن و ماددە هۆشبەرەکانەوە هەیە، بەشێکی دیکەشیان پەیوەندییان بە تاوانەکانی دیکەوە هەیە،" جەختیشی لە "بەردەوامبوون لە جێبەجێکردنی فەرمانەکانی دەستگیرکردن" کردەوە.